Corpus Van Reenen-Mulder (CRM14): Oorkonde K660r37101

Wy Wouter Jans sone ende Heinric Caluaerd , scepen in Rosendale , maken cond allen luden dat voer ons quam Heinric Lambrechts sone ende verlide dat hi sculdech is den nonnen van Breda drie scellinghe ende ses penninghe grote paeyments erfelec ende eweleec duerende , te gheldene altoes ende alle jaere op sente Mertens dach in + den winter , van drie ende twintich cop saed~lands luttel min of meer gheleghen in de vierscare van Rosendale binnen Hulsdonc ; voerd is vorwaerde dat Heinric vors_ of syn nacomelinghe desen vornoemden erffchys af~lossen moghen bi + den scepenen ende den rechter daers die nonnen ghehouden syn ende dan mach Heinric voersc_ of syn nacomelinghe haren wille doen met desen drie ende twintich cop saed~lands ; ende Heinric voers_ heeft versekerd ende ver~onder~pant desen voerscr_ erffchys op syn huys ende op syn hof gheleghen te Hulsdonc , Ghise Ghermix sone aen die een side , ende Jan Michiels sone op dander side ; ende voerd op eenen halven buunder made gheleghen in de Vaer~noest dewelke jaertyts omgaet met Avezoeten van + der Mere , streckende met den oesteynde aen de beke , Weyn Aerds sone ende Herman Gobben sone gheleghe met haren erve aen de zuutside ende Godevaerd Zoeten man ende Gielys Ghenen sone met haren erve aen de noerd~side . In kennissen der waryt hebben wi scepenen vorscr_ desen brief bezeghelt met onsen zeghelen . Ghedaen int jaer ons Heren , M . + drie + hondert ende een en tseventich , op den achtienden dach van aprille .