Corpus Van Reenen-Mulder (CRM14): Oorkonde K660r37401

Wi Wouter Jans sone ende Heinric Calwaert , scepenen in Rosendale , kennen dat voer ons quamen Lysbeth Scevels met horen momboer die hoer ghegeven was metten rechte Meeus , Godevaert , Kerstine ende Lysbeth hoer kindre verlyden dat si genomen hebben drie buunre moers gheleghen in prochye van Rosendale an die west~zide van Gielys goede van den Wigaerde ende Diederics Sterken streckende toet op den sloet die gaet toet an den langhen dyc ghelyc als der brief begrepen heeft die wi daer af hebben , dat is te wetene van Sinte Mertyns misse naest comende over tien jaer . Ende zoo welken tyt dat dese tien jaer volcomen syn , soe gheloven Lysbeth , Meeus , Godevaert , Kerstine ende Lysbeth vors_ den nonnen van Breda van den vors_ goede al sulken cheyns jaerlycs te betalene als men an beyden gheeft daer den moer af ut ghedolven es ende alle zaken zonder erghe~list . In orconden deser lettren die waert ghegheven int jaer ons Heeren dusent drie hondert jaer ende viere ende tseventich op den viertienden dach in Aprelle .