Corpus Van Reenen-Mulder (CRM14): Oorkonde K660r37701

(onleesbaar) een zester ende vyftien loepen rogs tsjaers erflicx pachts , goet ende custbaer alle jare te leveren bynnen Breda ende metter maten van Breda , ende te betalen tote onse vrouwen lichtmisse ; dats te weten , daer af te heffen die zeven loepen op een stuc lands bi + der hoeven op die Molenvliet gheleghen , dat daer tote dyer hoeven oec hoert , die Dieric Starcke nu in handen heeft , daer uut te gane even ghelyc den een ende twintich loepen rogs erflyc die daer al op plach te hebben doude Claeus van Oekele Arnds ouder~vader was voers_ . Ende die ander drie halsteren rogs te heffen ende die Diric Starcke voers_ jaerlicx ghelde uut der heelre hoeven voers_ met al + den goede , zoe waer dat gheleghen is , datter toe hoerde , ghelyc als Arnd Bloc syn vader daer uut verstarf , behoudelyc yegheliken sinen kenliken chyns ocht pacht dyen hier vore ocht even ghelyc desen op des goede jaerlic sculdich is te hebben . Ende in + den erfpachte voers_ zoe is Geryt Reysenaelden ghevest ende toeghedaen met vonnis ende met rechte tote behoef Henrix voers_ , zoe~dat hem seker es ende . + vaste Voert zoe heeft Arnd Bloc voers_ gheloeft in gherechten erfvorwerden , ghevyele namaels dat dese onderpande verzwaecten , ende te snoede worden , zoe souden hyt dan goeden ende verzekeren bi scepen prise . In orconde desen brieve met onse zeghelen beseghelt , int jaer ons Heeren M . + CCC . + zeven ende tseventich , vyf ende twintich dage in Meerte .