Corpus Van Reenen-Mulder (CRM14): Oorkonde K660r38001

Ic , Willem , here van Donghen , make cond ende kenlike alle den ghenen die desen brief sullen sien ende horen lesen , dat ic wittelic verkocht hebbe om een somme van ghelde die mi vol ende al betaelt es , eerzamen goeden luden . . vrouwe Luytgaerde van Goerle , priorinne van + den nonnen bi Breda , van + der ordenen van Premonstreyt , ende horen ghemeynen convente , erflic ende ommermeer , drie hoeven moers met den gronde , dat es te weten elke hoeve voer twaelff buynre ghemeten , die gheleghen syn in mynre wildert te Donghen , aengaende ende beghinnende oestwert op teynden Godevaerts goed uten Berghe ende streckende van daer opwaert neven Mathys goet uten Berghe aen de zuytside , ende myns selves goet dat noch ter + tyt in wilderden gheleghen es aen die noerd~side ghelyc dat hem daer beput ende bepaelt is ende ghelevert bi + den ghezworen landmeter des lands van Breda , met welker maten , leveringhe ende palen dat voers_ convent op die een side ende ic op dander side ons hebben eendrachtelic laten ghevueghen sonder enigherhande onderzoec of nametinghe daer af namaels te leyden of te verzoeken in enigher maniren ; ende van desen voers_ drie hoeven goets zal dat voerghenoemde convent ende hare nacomelinghe erflic bliven gheldende mi ende minen nacomelinghen heren te Donghen drie oude grote tsjaers , dats te weten van elker hoeven enen ouden groten , goet ende custbaer of ghelyc paymente daer vore in dier waerde , te leveren erflic ende alle jaer op sente Martyns dach in + den winter , op ten huse te Donghen of ter stede daer dan ter tyt die ghebeure van Donghen haren chyns betalen , sonder argheliste , ende in alzulker voerwaerden al waert dat dat vors_ convente tot enigher tyt versuymde dien jaerlixen chys te betalen opten dach dat hi verviele dat ic noch myn nacomelinghe bi dien ghebreke gheen aantale maken en soude tote horen goede oft hinder of letsel daer in doen , ten ware of si verhielden dien chyns te betalen een jare lanc tote dat ander paye daer af verviele ; soe mocht ic of myn nacomelinghe dat goet doen bestellen met recht ende een ghelyc landrecht daer op vorderen tote aen der tyt dat ons ghenoech gedaen si van den chize die dan voerleden zal syn . Met welken chize dat ic , Willem , heer van Donghen , gheloeft hebbe ende ghelove voer mi ende voere myn nacomelinghe , heren te Donghen , den convent vors_ dit voerghenoemde goet te waren ende te vryen tote ewighen daghen tegen alle die ghene die hem rechts tegen voers_ goede vermeten mochten van alre scattinghe , bede of onghelde die ic of anders yemand daer op eysken mochte in enigher wys . Voert so ghelove ic den voers_ convente ende horen nacomelinghen vore mi ende vore myne nacomelinghen wech ende waterganc te leveren over myn wildert , weghe ende straten die nu syn , buten horen cost , daer sys behoeven ende alle ghemeyne weghe , brugghen , vaerde ende waterganghe die namaels om ghemeyn oerbaer daer gheleghet sullen worden , dat si die ghebrueken sullen vrylic ende onwederseghet met rechten ghebuerliken coste . Ende waert dat si tote horen goede enighe naerder weghe buten mynre wilderde doere mynre ghebuere erve behoefden , die soude ic hem doen hebben met hoerre weseliker coste . In kennisse der waerheit is dese brief bezeghelt met minen zegle . Ende om die meerre zekerheit ende vestenesse den voers_ convente te doen , so hebben ic verzocht ende ghebeden Jan van Dalem , minen lieven broeder , dat hi desen coep ende vorwaerde vors_ met mi ende ghelyc mi gheloven ende consenteren wille . Ende daer + toe hebbe ic ghebeden Zebrecht Thierlote ende Peter van Gagheldonc , minen mannen van leen , Gheryt van Hosenhout ende Godevaert uten Berghe , minen scepenen te Donghen dat si dit in ghetuyghnesse met mi zeglen ende kennen willen . Ende want ic Jan van Dalem aenghesien hebbe die goede gunste ende wittighe vorwaerde die in deser sake ghesciet es tusken den convent des godshuys vors_ op die een side ende Willem , minen lieven broeder , op dander side , soe hebbe ic desen coep ende worwerde geconsenteert ende gheconfirmeert ende ghelove die vast ende ghestade te houden vore mi ende vore mynre nacomelinghe ende hebbe in vestenesse dies minen zegle aen deze brief ghehanghen . Ende om~dat wy Zebrecht Thierlote en Peter van Gageldonc , als manne , en wy Gheryt van Hosenhout ende Godevaert uten Berghe , alse scepene Willems , here van Donghen , voers_ , over dese zaken ende vorwaerde gheroepen waren , daer si volschieden ende bedreven waren in alle der manieren dat voers_ staet , soe hebben wi desen brief in ghetuychnesse beseghelt met onsen zegle . Dit was ghedaen int jaer ons Heren M . + CCC . + tachtentich , op sente Lambrechts + dach .