Corpus Van Reenen-Mulder (CRM14): Oorkonde K661r33601

Wi Jan Cockelberch ende Wouter van Bavele , scepen in Oesterhout , maken cont allen den ghenen die desen brief sellen sien ofte horen lesen , dat voer ons comen es Heynrijc Reynbout ende verlide dat hi hadde ghenomen twe buunre beemde , die gheleghen siin in den Wijsterd tot Oesterhout , te gherechten sinse ieghen tgoedshuus van Tongherloe , durende tote sinen lijve ende Katelinen siins wijfs , ende niet langher , ende welc hoere van hem beyde die lancst leeft , die sal beyde die buunre behouden gheheel siin levedaghe , sonder iemans wedersegghen , eelc buunre voernoemt jaerlijcs om vyf schellinghe zuarte , enen ouden groeten tornoysen van sconincs monte van Vrankerike gherekent voer xvj d_ oft payement dat daer goet jeghens waere ; ende desen siins voernoemt es men schuldech altoes te betalen op sente Mertijns dach in den winter , ende hier + mede soe saelt Heynrijc ende Kateline siin wyf verwaren van sheren siins ende van alle onghelde hoer leefdaghe , ende welken tijd dat Heinrijc ende Kateline voernoemt siin comen van live te doede , soe saelt tgoedshuus van Tongherloe voernoemt siin hande aenslaen ofte die van tgoedshuus weghen siin aen die twe buunre beemde voernoemt sonder enech wedersegghen van hoere beyder erfghenaemen van iemanne . In kennisse der waerheyt , soe heb wi scepen voernoemt desen brief beseghelt met onsen seghelen . Ghegheven int jaer ons Heren M˚ CCC ende xxxv&jring; , des saterdaghes nae sente Aghaten dach .