Corpus Van Reenen-Mulder (CRM14): Oorkonde K672r39701

Cont si allen lieden / dat wij Rolof Cuyst jan Cuyst rolofs zoen voer ons ? van wijc voer mi en_ voer mijn kindren Ansom van ghesel oec voer mi ende voer mijn kindren / ouermids dat enich va_ ons hem versuemt en_ misvuert heeft met ontsecghen / ouerdaden / onseden / en_ viantscepen / bouen recht / Reden ende besceedt tieghen den Meester va_ postel tieghen die brueders ende aen den goeden den godshuse va_ postel toebehorende / daer af dat enich van ons ghehoude_ en_ gheuanghen gheweest heeft in + den lande van brabant va_ sine_ liue / Ende om~dat die meesters van postel he_ daer in so gonstelike_ / en_ so vriendelike_ gheproeft hebben / ende die ons verbeden en_ ghequijt hebben tieghen onser ghanadigher vrouwen van Brabant vter vanghenissen voerscr_ So eist dat wij ons verdraghen en_ verbonden hebben bi sprake_ van goeden liede_ die daer toe ghehulpen hebben / Reden en_ besceet aen~ghesien / en_ hebben gheloeft bi trouwen bi Eren en_ bi sekerheiden en_ hebben daer toe ghesekert en_ ghesworen met gherecten vingheren voer ons en_ voer onsen nacomelinghen also voerscr_ is / dat wi noch gheen van ons / noch va_ onsen nacomelinghe_ in + der maniere_ voerscr_ den vorscr_ godshuse van postel / of yemen hem toebehorende / of haren goeden ne_mermeer co_mer noch scade / noch ouerdaden met onbescede boue_ recht doen en sullen / noch doen doen / bi ons of yeme_ van ons_ weghen die wij verantw_den willen / Behouden altoos / of wij of enich van ons he_ rechts v_meten aen eneg_hande goede_ die dat vorscr_ godshuus hebbende en_ besittende is binne_ den vorseide_ lande van brabant gheleghen want wij ons tot ghenen andren goeden rechts en v_meten dat wij daer toe met recht souden moghen spreken en_ recht sueke_ voer die banke_ daer die goeden gheleghen waren en_ anders nerghen sonder begrijp en_ altoes in vrienscepen / sonder den goeden lieden des godshuus va_ postel vorscr_ eneg_hande vianscepe te bewisen in eneg_ maniere_ jn ke_nisse_ der waerheit so hebben wij desen breu_ beseghelt met onsen seghelen vuthanghende Ende om~dat wij wille_ dat dese dinghen vaste stendich en_ ghehouden bliue_ tot ewighen daghen sonder verbreke_ So hebben wij ghebede_ onsen lieue_ en_ geminden den Edelen her willem va_ morhem . . h_e van Boxtele Rudd_e dierike_ Cuyst van gam_en Gielise bat b_touts zoen en_ Bruysten jans noydens zoens zoen / dat si dat met ons en_ op ons beseghelen wille_ Ende wij willem van merhem . . h_e van Boxtel Rudder Dieric Cuyst van gameren Gielis bat b_touts zoen en_ Bruyste_ jan noydens zoens zoen ou_mids bede va_ Rolof Cuysten jan Cuysten sine_ zoen Arnt van wijc Ansom va_ ghesel onsen gheminden maghen en_ vriende_ om~dat wij bi desen verdraghe gheroepen en_ ghebeden gheweest hebben so hebben wij dese breu_ beseghelt op he_ en_ met he_ met onsen seghelen vuthanghende jn ghetughenissen der waerheit van allen den vorscr_ pointen / Dit was ghedaen int jaer ons h_en doe + me_ screef van sijnre gheboerte_ Dusent Drie + hondert tneghentich en_ seuen opten twee en_ twintichsten dach van Meye - - -