Corpus Van Reenen-Mulder (CRM14): Oorkonde K687r35201

Et sijn comen danel van + den staedecker / henric die Cro_me gherart van mellinrode ende godeuart van + der hameyden / ende hebben ghetuecht eendrachtichliken / als Scepene dat zi daer bi waren als Scepenen / daer Enghelberen van ellaer quam in eenre tijt die leden is ende sprac jhan van ellaer hoeren broeder ane met den recht in enen gheba_nen ghedinghe tot oerscot / als van + den goede van ellaer / gheleghen in + der prochghien van oerscot / Ende dat ihan voerseyt daer dedingde / op sijn clercscap / ende op enghene poert ende dat ihan vorseit daer also vele sprac / dat hom die richter vraghede / of hi aen sijn woert ghiede / ende dat jhan voerseyt doen niet en seyde / mer hi sloech sijn hant voer sine_ mont / Ende dat jhan voers_ daer nae quam in een ander ghedinghe / ende seyde dat hi poerter were tot shertoghen~bossche / ende dat hi hoepte dat hi tot oerscot niet sculdich en were te antworden / mer waer of te welker tijt jhan voerseyt poerter waert des en wisten si niet . voert sijn comen Roef marme_ / arnt ne_nen zoen / Ende kerstiaen van + der hilsdonc / ende hebben ghetuecht aen den heilghen ou_mids manisse srichters dat Enghelberen voerseit langhe te voeren ghecroent hadde / op ihan voers_ als van + den voerseyden goede eer die selue ihan poerter waert / voert sijs comen willem van + den dyke / Ende . . heinric here_ Arnds / ende hebben ghetuecht aen den heileghen ou_mids manisse srichters / dat tot dierre tijt dat men sophien van ellaer ter erden bestaedde jhan voerseyt quam / ende boet enghelberen voers_ hondert pont / op alsulke_ vorwarde / dat si op hoer recht van + den voerseyden goede vertyen wilde tot zinen behoef / Ende dat Enghelberen voerseyt doen seyde dat si daer niet voer en neme Twe + hondert pont / Oec tugheden die selue willem ende henric / ende kerstiaen lirincs zoen met hon op hoeren eet / dat jhan voerseyt niet poerter en was tot dierre tijt / daer sophye voerseyt quam van + den leuen tot der doet Jn orconscap des ghetuechs wi danel van + den staedecker gherart van mellincroede / en_ godeuart van + der hameyden voerseyt / dideric van ouer~laer dideric willems zoen was van aerle / henric van heersel en_ jhan van blaertu_ Scepene in oerscot hebben onsen ghemeynen Seghel hier aen doen hanghen / Ghegheuen in + den jaer ons h_en als men screef dusent drie + hondert vijftich ende twee op den vierden dach in Maerte