Corpus Van Reenen-Mulder (CRM14): Oorkonde K687r35202

Et sijn come_ danel van den staedecker heinric die cro_me gherart van mellinrode / En_ godeuart van der hameyde_ / en_ hebbe_ ghetuecht eendrachtichlike_ als Scepene / dat si daer bi ware_ als Scepene daer enghelbere_ van ellaer quam in eenre tijt die leden is en_ sprac ihan van ellaer hoere_ broeder ane met den recht in ene_ gheba_ne_ ghedinghe tot Oerscot als van de_ goede van ellaer / gheleghen in der prochghien van oerscot / En_ dat ihan voerseyt daer dedingde op sijn clercscap en_ op enghene poert en_ dat ihan vorseit daer also vele sprac / dat hom die richter vraghede oft hi aen sijn woert ghiede / en_ dat ihan voerseyt doen niet en seyde mer hi sloech sijn hant voer sine_ mont En_ dat ihan voers_ daer nae quam in een ander ghedinghe en_ seyde dat hi poerter were tot shertoghe_~bossce / en_ dat hi hoepte dat hi tot oerscot niet sculdich en were te antworde_ / mer waer oft te welker tijt jhan voerseyt poerter waert des en wisten si niet Voert sijn come_ Roef marme_ arnt ne_nen zoen En_ kerstiaen van der hilsdonc / ende hebben ghetuecht aen den heileghen ou_mids manisse srichters dat Enghelbere_ voerseyt langhe te voeren ghecroent hadde op ihan voers_ als van den voerseyden goede eer die selue ihan poerter waert / voert sijn come_ willem van den dyke / En_ . . heinric here_ arnds en_ hebbe_ ghetuecht aen den heileghe_ ou_mids manisse srichters / dat tot dierre tijt dat men sophien van ellaer ter erden bestaedde jhan voerseyt quam en_ boet enghelbere_ voers_ hondert pont / op alsolke_ vorwarde dat si op hoer recht van den voerseyde_ goede vertyen wilde tot sine_ behoef En_ dat enghelbere_ voerseyt doen seyde dat si daer niet voer en neme Twe + hondert pont Oec tughede_ die selue willem en_ heinric / en_ kerstiaen lirincs zoen met hon op hoere_ eet / dat ihan voerseyt niet poerter en was tot dierre tijt / dat sophie voerseyt quam van den leue_ tot der doet Jn orconscap des ghetuechs wi danel van den staedecker gherart van mellincrode En_ godeuart van der hameyde_ voerseyt didderic van ouer~laer / didderic willems zoen was van aerle / henric van heersel en_ ihan van blaertu_ Scepene in Oerscot hebbe_ onse_ ghemeyne_ Seghel hier aen doen hanghe_ Ghegheue_ in den jaer ons heren als men screef / dusent drie + hondert vijftich ende Twe op den vierden dach in Maerte .