Corpus Van Reenen-Mulder (CRM14): Oorkonde K715r35002

Wi henric van Cultatsrode . Ansem willems soen . Henric van den bogarde en_ ghijsbrecht die scoemakere Scepenen jn myrde / maken Cont enen yegheliken / dat voer ons was ghestaen Ghijsbrecht van ghi_nouen / soen cooiken tere ghijsbrechts was van ghinnouen en_ bekende voer ons dat hi hadde vercocht / jn eenen witteghen Cope / den godtshuse / en_ den meesters tote behoef des goedshuis van postele / vijftich aude groete / Coninx tournoise / der mointen van vrancrike of die w_de daer tieghen jaerlijcs ende erflijcs thijns alle iare tsondaeghs na sinte remeis dach te rosel daer die van Postel heren~chijns nemen te ghelden ende te betalen / Ende tue mudde Rogghen jaerlijcs en_ erflijcs pachts / alle jare op onser vrouwen dach / als men kersen dreeght / metter maten van myrde te leueren en_ te betalen / (onleesbaar) (onleesbaar) (onleesbaar) die hier benoemt sijn / dat is te wetene / op een stuc lants / gheheiten die valacker daer men tuschen / tien loepen en_ en mudde rogs op sayt / streckende m_ den eenen ende / aen den poelschen hof / en_ metten andren ende aen die heide / Ende op een stuc lants gheleghen in die stelcrijt / daer men op sayt ontrent / neghen lopen rogs / streckende metten eene_ ende / ane die strate / en_ metten a_dre_ einde aen die rijt / Ende op giben deel van den hoembroeke voert op sijn huis en_ op sijn hof m_ alle sijnre toe~behoert / en_ op een stucksen beemts / also verre alst voertijts heinric ghiben was op den dach des hijt vercocht / Ende op gheen oudste eusel dat aen gheen breetuenschen dijc gheleghen es Ende / ghijsbrecht van ghinnouen voergheseit heet gheloeft op hem en_ op sijn goed / dat hi heet / ocht ghecrighen mach den voernoemden godshuse en_ den meest_s van postel allen voerco_mer / en_ alle bringen af te doene / van den voerghenoemden valacker / wtghenomen der h_en chijns die men daer van rechte sculdech es af te gheldene / en_ te waren / op dese voerscreuen gheloefte als men erue sculdech is te waren ende gheuuoente es / jn orconde des briefs beseghelt met onsen ghemeinen seghel van myrde jnt jaer ons heren Dusent Drie + hondert ende vijftech vijftien + daghe jn wedemaent