Corpus Van Reenen-Mulder (CRM14): Oorkonde K720r35202

Wi danel die rademaker / gherart lachghards / godeuart scuensincs / heinric nyclaus zoen / heinric dyonijs zoen was / heinric nouts En_ heinric die win Scepene in eersel tughe_ onder onse_ ghemeyne_ Seghel dat voer ons come_ sijn arnt ihans kosters zoen was van eersel voer hem / En_ aleyt sijn moeder met hoere_ momboer dien hoer die richter gaf met vo_nisse der Scepene en_ hebben ghelijt en_ ghekent dat si en_ hoer erfghename_ nae hon erfelike gheldende sijn en_ voertaen sculdich sijn te ghelden broeder heinric den kelnere van postel / en_ sine_ naeuolghere_ in dat selue ambacht van der kelnerien vijftien aude grote ene_ grote_ sconincs mvnte_ va_ francrike voer sestie_ pe_ninghe gherekent oft die weer daer teghe_ in andere_ ghelde / alle_ iaer erfelike_ en_ o_mermeer op sente andries dach te ghelde_ en_ te betale_ / vte als?lkene_ erue gheleghe_ in der prochghien van eersel eest huys eest hof eest beemde eest lant / als ihan die koster voerseyt en_ aleyt sijn wijf verkreghen hadden / ghelijc alst hon met der k?le_ teghen nyclause van parweys gheualle_ is . wellic voerscreue_ erue voermaels heren heinrics des parsoens van eersel te wesen plach Ghegheue_ in den iaer ons here_ als men screef Dusent / + drie + hondert / + vijftich en_ twe op den viue en_ twentichsten dach in Sporkelle .