Corpus Van Reenen-Mulder (CRM14): Oorkonde K720r35501

Wi symoen danels zoen / Godeuart scedekens / willem luten / wouter houemans / bartolomeus houemans / ihan peters swagher / En_ heinric die win Scepene in Eersel tughen onder onsen ghemeyne_ Seghel / dat voer ons comen sijn Didderic gheheyten kreyten die Smyt van loen / voer hom / En_ margriete sijn wijf / met hoere_ momboer die hoer die richter / met den rechte ghegheue_ hadde / En_ hebben erfelike vercoft voer hon / en_ voer hoer erfghename_ nae hon / ihan den kemenader van Postel / gheboren van lieshout van der moelen / tot sinen behoef / en_ sijnre erfghename_ nae hem / Drie mudde goeds rogghen / En_ gheefs der gherechter maten van Eersel / alle iaer erfelike / en_ o_mermere / op kersauont te ghelden / en_ te betalen / En_ te heffen / en_ te boeren vte ene_ stucke lands gheheyte_ tvlas~lant gheleghen bi Enghebrechts erue / in der prochien van kasterle vte der loden~hofstat / met hoerre toebehoerten / gheleghen bi euerards erue / in der voerseyder prochien van kasterle / vte ene_ erfenisse gheheyte_ die loden~hoeue met hoerre toebehoerte_ / die ghedeylt is / van laiwreynsen erue van den vaernehoe? / gheleghen in der p_chien van loen / vte der hofstat / met den bocht daer aen gheleghen / en_ met den heyde~bocht daer naest gheleghen ghelijc als dat den voerseyden didderike toebehoerende is / gheleghen in der voerseyder p_rochien van loen / vteghenome_ des voerseyde didderics husinghe / die op die voerseyde hofstat staende is / En_ vte ene_ erfenisse met sine_ toebehoerte_ gheheyte_ tnvlant met der heyden daer toe behoerende / dat didderic voerseyt ligghende heeft in der voerseyder p_rochien van kasterle / En_ dit is al te verstaen als didderic voerseyt seyde / En_ dat didderic voerseyt voer hom / En_ margriete met hoere_ mo_boer voerseyt / den voerseyde_ ihan hebben doen houe_ en_ erue_ in al dese voerscreue_ onderpande / als voer die voerseyde drie mudde rogghen syaers in alle maniere_ / als ghewoenlijc / en_ recht is in tsijns~goet / En_ dat didderic voerseyt voer hom / En_ margriete met hoere_ momboer voerscreue_ hebben gheloeft / op hon / en_ op hoer goet / den voerseyden ihan tot sine_ behoef / en_ sijnre erfghename_ nae hom / die voerseyde drie mudde rogghen syaers in die voers_ onderpande te weren / als men erue met recht sculdich is te weren / En_ alle voerco_mer af te doen sonder der heren tsijns van den gronde / Ghegheue_ in den iaer ons heren als men screef Dusent drie + hondert vijftich en_ viue / op den twelften dach in januario .