Corpus Van Reenen-Mulder (CRM14): Oorkonde K720r36202

Wij Symon danels zoen heinric steenvoert willem scordels dyderic die moller heinric nyclaus wouter die hanscomeker en_ wouter hoefma_s scepene in Eersel tughen onder onse ghemeynen seghel dat voer ons sijn comen Heilwijch dyderics hammans wijf was die docht_ gherouts was van steensel met ho_en monboer en_ dyderic hoer zoen ende hebben ghesamender hant ende onghesceiden gheloeft voer hon ende voer ho_en erfghenamen na hon den . . Goedshuys van postel Een mudde goeds ende gheefs rogghen syaers alle jaer Erfliken en_ e_mermeer op ons_ vrouwen dach lichtmisse als + men kersen bornt te + ghelden en_ te + betalen met + der gherecht_ maten van eersel te + heffen en_ te + boren vte eenre bochte die heylen didden te + wesen plach jn + der p_chien van eersel gheleghen aen ardts cost_s erue met eenre siden aen heinrics smeeds kinder erue met + der and_re siden en_ aen die strate met + den eynde / Ende dat vorwarde is soe wa_neer heylwijch en_ dyderic hoer zoen vorscr_ oft hoer erfghenamen na hon dat vors_ mudde rog_ syaers op den vors_ pachdach nijt en + betaelden dat dan dat vors_ goedshuys sijn hant sal slaen aen dien Onderpant vorscr_ ghelijc oft hie (onleesbaar) ende vervolgcht waer met alle_ recht voer den vors_ pachte En_ dat dyderic vors_ voert gheloeft heeft als die vors_ bocht is opcomen voer den vors_ pachte dat hie daer op als een erfghename ne_mermeer dan spreken noch dedinghen en sal Ghegheuen int jaer ons heren dusent drie + hondert tsestich en_ twee op sente barberen dach der heylegh_ maghet . .