Corpus Van Reenen-Mulder (CRM14): Oorkonde K720r38101

Wij didderec van der molen heinrec steenvoert Steuen moleman Claes van perwers heinrec die winne heinrec stinen van stoclo en_ arnt loys Scepene in Eersel tughen onder onsen ghemeynen zeghel dat voer ons comen is wouter willems zoen van loeuen van westerhouen en_ heeft vercocht in ene_ erfleken recht voer hem en_ voer sijn erfghenamen nae hem heinrec jordaens neue van westerhoue_ tot sine_ behoef en_ sijnre erfghenamen behoef alselken mudde rogghe_ syaers erfs~pachts als willem willems zoen van loeuen wouters brueder voerscr_ den seluen wouter iaerlijcs gheldende was op onser v_uwen dach licht~misse als men kerssen bornt vut ene_ beemde in der p_chien van westerhoue_ gheleghe_ die wille_ voerscr_ teghen wout_ sinen brueder v_creghe_ heeft ouer een mudde rogghen syaers en_ vut enen beemde in der seluer p_chien gheleghe_ mett_ eenre siden aen heinrec molners erue en_ mett_ and_e siden aen die ghemeynte welken voerg_ beemt die selue willem wout_en sinen brueder gheset heeft tot ene_ onderpande ouer dat voerscr_ mudde rogghen syaers En_ wouter voers_ heeft op dat voers_ mudde rogg_ en_ op alle rechten en_ voerw_den die hij daer af hebben mocht helmelinghen en_ tot eweghe_ daghen verteghen tot behoef heinrecs voerscr_ en_ sijnre erfghename_ nae hem Ghegheue_ in den iaer ons h_en gheboerte Doe men screef dusent drie + hondert Tachtentech en_ een viue en_ twentich daghe in Merte