Corpus Van Reenen-Mulder (CRM14): Oorkonde K739r35701

Wi Jan van Waerloes , Gieliis van Overbroech , Gieliis van Zenthout ende Willem Goele , manne miins here van Tongerle te Duffle int hof van der Elst , doen cont ende kenlech allen den ghenen die dese letteren selen sien ende horen lesen , dat comen es vore ons in properen persone , Jan Bau , ende kende ende lide dat hi vercocht heeft witteleke ende wale miin here van Tongerle , een bosch ende een eusel , te~gader gheleghen , ende hout viere boendere een vierendeel ende neghene en tsestech roeden , luttel min ochte luttel meer , ghelevert metter maten gheliich dat gheleghen es neven een bosch , es miins heren van Witham in dene side ende een bosch es gheheten Draecbosch in dander side , gheliich dat hoeft met allen rechte te Duffle int hof van der Elst ; ende omme dat wi Jan Bau vorgen_ begaren ende willen dat dit vaste ende ghestade blive , soe hebben wi dese letteren besegelt met onsen properen seghele , ende biidden voert Godevaerde van der Tanghen , die meyere es miins heren vorgh_ in dit vorgh_ hof ende Janne van Waerlose , Gielise van Overbroech , Gieliis van Zenthout , ende Willem Goelen , die manne siin miins heren vorseit in dit vorgh_ hof , dat si hare seghele hanghen ane dese letteren in kennissen der waerheit ; ende omme dat wi hier over ende mede hebben gheweest ende over~mids der beden Jans vorgh_ , soe hebben wi Godevaert van + der Tanghen , meyere ons liefs heren vorgh_ ende Jan van Waerloes , Gieliis van Overbroech , Gieliis van Zenthout ende Willem Goele , manne ons liefs heren vorghen_ onse seghe ghehanghen ane dese letteren in kennissen der waerheit . Ghegheven int jaer ons Heren doen men screef &mring; ccc˚ viiftech ende sevene , des sondaechs vore sente Luucs dach ewangelisten .