Corpus Van Reenen-Mulder (CRM14): Oorkonde K739r36402

Allen den ghenen die dese letteren selen sien ende horen lesen , Gielijs van Overbroec , Jan van Waerloes , Heinrijch van Boxtune ende Godevaerd van + der Tanghen , manne int thof van + der Elst te Duffle , saluut met kennissen der waerheyt . Wij doen te wetene jeghewelken dat comen es vore den rechtere , die rechtere es in dit vorghenoemde hof , ende vore ons , brueder Woutere gheheten Bac , bi + der gratien Goeds abdt te Tongherle ende tghemeine convent van + der selver stede , ende hebben ghekent ende ghelijt dat si terve hebben ghegheven Godevaerde van Wayenborch ende sinen nacomelinghen een vierendeel lants metten gronde luttel min ochte luttel meer gheleghen neven der capittelen goet van Antwerpen in + de prochye van Duffle gheleghen ende dat men houdende es van + den hove van + der Elst vorghenoemt omme tweeleven oude groete ende twee hinnen tsaers erfeleke ende emmermeer te gildene en + te betaelne tallen kerssavonde int hof van + der Elst te Duffle ; vort meer soe heeft gheloeft de vorghenoemde Godevaerd die vorghenoemde goet te betimmerne ende daer met te veronderpande , ende hier toe es ghesciet al datter toe sculdech was te ghesciene metten vonnisse ende metten rechte , ende gheen poynt van rechte achter ghelaten ; ende omme dat dit soude bliven vaste ende ghestade ende over~mids der beden ende tfersueken ons liefs ghemiins heren ende sijns convents vorghenoemt ende oec Godevaerds vorghenoemt , soe hebben wij Gielijs van Overbroec , Jan van Waerloes , Heinrijc van Boxtune ende Godevard van + der Tanghen manne vorghenoemt onse zeghele ghehanghen ane dese letteren in kennissen der waerheyt , behoudeleke altoes jeghewelken sinen rechte . Dit was ghedaen int jaer ons Heren doen men screef dusentegh drie + hondert tsestegh ende viere , te zente Mertens misse .