Corpus Van Reenen-Mulder (CRM14): Oorkonde K739r36403

Allen den ghenen die dese letteren selen sien ende horen lesen , Gielijs van Overbroech , Jan van Waerloes , Godevaerd van + der Tanghen ende Heinrijc van Boxtune , manne int hof van + der Elst te Duffle , saluut met kennissen der warheyt . Wij doen te wetene jeghewelken dat comen es vore den rechtere , die rechtere es in dit vorghenoemde hof , ende vore ons , brueder Woutere gheheten Bac , bi + der gratien Goeds abdt te Tongherle ende tghemeine convent van + der selver stede , ende hebben ghekent ende ghelijt dat si terve hebben ghegheven Gielise van Zenthout twee buenre ende een vierendeel beyde lant ende eusel , gheleghen in + de prochye van Duffle bi Gielijs woninghe vorghenoemt , omme drie sister rogs ende sesse muddekene rogs tsaers erfelex pachts , goet ende custbeer te gildene ende te leverne tallen kersavonde binnen Duffle in + de hoeve ter Elst ; vort meer soe heeft de vorghenoemde Gielijs gheset tenen onderpande drie vierendeel lants metten gronde luttel min ochte luttel meer , gheleghen op de Reedt , ghelijc dat men houdende es van + den hove van + der Elst te Duffle , ende ware oec dat sake dat men desen vorghenoemden pacht niet en gave van jare te jare , ghelijc alse vorgheseegt es , soe de ghene dies machtech ware ochte die ghewarech boede ware van + des vorghenoemds weghen sijn hant slaen ane dit vorghenoemde goet ghelijc dat een vonnisse wisen soude , behoudeleke altoes jeghewelken sinen rechte ; ende hier toe es gesciet al datter toe sculdech was te ghesciene metten vonnisse ende metten rechte , ende gheen poynt van rechte achter ghelaten ; ende omme dat dit soude bliven vaste ende ghestade ende over~mids der beden ende tfersueken ons liefs ghemins heren ende sijns convents vorghenoemt ende oec Gielijs vorghenoemt , soe hebben wij , Gielijs van Overbroec , Jan van Waerloes , Godevard van + der Tanghen ende Heinrijc van Boxtune , manne vorghenoemt + , onse zeghele ghehanghen ane dese letteren in kennissen der waerheyt . Dit was ghedaen int jaer ons Heren doen men screef dusentech hondert tsestech ende viere te zente Mertens misse .