Corpus Van Reenen-Mulder (CRM14): Oorkonde K739r36404

Allen den ghenen die dese letteren zelen zien ende horen lesen + , Heinrijch van Boxtune , Peter van Gestele ende Jan Liben , late Godevaerts Willebays , in + de prochye van Duffle , saluut met kennissen der waerheit . Wij doen te wetene jeghewelken , dat comen es vore den rechtere Godevaerts vorgh_ ende vore ons , Katheline wilen was Wouters dochter van Wiltbroech met Peteren den Coninc haren witteghen momboer , ende hebben ghekent ende ghelijt dat si vercocht hebben witteleke ende wale , Mechghiele Smoyse ende Pauwelse Smoyse sinen brueder ende haren witteghen oeyr ende nacomelinghen , een halster rogs tsaers erfelecs pachts goet ende custbeer , te gildene en + te leverne tallen kerssavonde binnen Meghle , war Mechghiel ochte Pauwels vorgh_ begaren , ende altoes metten Mechelscher maten , op derd + alf buenre beyde bosch ende winnende lant metten gronde luttel min ochte luttel meer , gheheten de Rogs~Velde , gheleghen neven der nonnen bosch , ghelijc dat houdende es Jan ende Claus ghebruedere wilen waren Wouters kindere van Wiltbroech , van Godevaerde Willebayse vorgh_ , ende gheleghen es in + de prochye van Duffle ; ware oec dat sake dat men dese vorgh_ twee viertelen rogs niet en gave van jare te jare , ghelijc alse vorgheseegt es , soe souden Mechghiel ende Pauwels vorgh_ ochte haer witteghe oeyr ende nacomelinghen hare hant slaen ane dit vorgh_ goet metten gronde ghelijc alse een vonnisse wisen soude ; ende Mechghiel ende Pauwels vorgh_ gheloven , ware dat sake dat hen dat goet quame ter hant , dat si souden pleghen ghelijc dat een op~gheseten laet pleecht van desen vorgh_ goede ; ende hier toe es ghesciet al datter toe sculdech was te ghesciene by manissen des rechters , ende by wijsdoeme der late , ende gheen poynt van rechte achter ghelaten ; Ende omme dat wij late vorgh_ wale weten dat dit aldus vore ons ghesciet es , ende wij ghenen zeghel en hebben , soe bidden wij goeden , wisen , eersamen lieden Goesene van Rumste ende Gielise van Overbroech , manne van onser liever gheminder vrouwen der gravinnen van Cleve , dat si hare zeghele hanghen ane dese letteren in kennissen der waerheyt ; ende omme dat ons dese vorgh_ late dese vorgh_ vorworde cont hebben ghemaect , ende overmids der beden der late en + der partyen vorgh_ , soe hebben wij Goesen van Rumste ende Gielijs van Overbroech , manne vorgh_ , onse zeghele ane dese letteren ghehanghen , in kennissen der waerheyt , behoudeleke altoes den here ende jeghewelken sinen rechte . Dit was ghedaen int jaer ons Heren doen men screef dusentech drie + hondert tsestech ende viere , des maendaegs nae zente Andries dagh .