Corpus Van Reenen-Mulder (CRM14): Oorkonde K739r36501

Allen den ghenen die dese letteren zelen zien ende horen lesen , Jan Bau , Gielijs van Overbroec , Jan van Waerloes , Heinrijc van Boxtune ende Godevaert van + der Tanghen , manne int hof van + der Elst te Duffle , saluut met kennissen der waerheyt . Wij doen te wetene jeghewelken , dat comen es vore den rechtere ende vore ons , Gielijs van Nyemanseyghen , ende heeft ghekent ende ghelijt dat hi vercocht heeft witteleke ende wale onsen lieven gheminden heere heren Wouteren gheheten Bac , bi + der gatien Goeds abdt te Tongherle , alsoe selken erfelecheyt metten gronde , gheleghen in + de prochye van Duffle tusschen Jan Sleppers goet ende Wouters Hous goet , alsoe verre alst den vorghenoemden Gielise toebehorende was ende hi hilt van + den hove van + der Elst , ende gheheten es Dnuwe , + goet ende een stucke lants es gheheten den Brant , ende es gheleghen ane de Rechtstrate , ende een stucke lants es gheheten Doude goet , ende leegt bi Wouters goet was van + der Boynt , ende dat men hout van zente Mertene van Duffle ; ende dar op heeft de kerke van Duffle twee scellinghe lovensche tsaers erfelex tsijs , en + de heylegheest van Duffle heeft + er op twijntech scellinghe payments tsaers erfelex tsijs ; ende des vorghenoems goets es alte~gader ghemeten metter maten achte buenre een vierendeel ende vive ende dertegh roeden , luttel min ochte luttel meer , gheleghen in bossche , in beemde , in winnende lande ende metter woeninghen , welke vorghenoemde goet de vorghenoemde Gielijs by manissen des rechters ende by wijsdoeme der manne en + der late in + des rechters hant op heeft ghedraghen , ende dar af verteghen metten halme ; ende van al + den rechte dat hi daer ane hadde ochte hebben mochte ; ende dat te heren Wouters behoef vorghenoemt ; ende heeft gheloeft de vorghenoemde Gielijs den vorghenoemden heren Wouteren hier af waerscap te jare en + te daghe ghelijc als men pleegt ende men sculdegh es te doene , soe dat de vorghenoemde rechtere by siere manissen ende by wijsdoeme der manne en + der late in dede ende in erfde den vorghenoemden heren Wouteren in dit vorghenoemde goet erfeleke te besittene , behoudeleke altoes jeghewelken sinen rechte ; ende hier toe es ghesciet by manissen des rechters ende by wijsdoeme der manne en + der late al datter metten rechte ende metten vonnisse toe sculdegh was te ghesciene , ende gheen poynt van rechte achter ghelaten . Ende omme dat dit soude bliven vaste ende ghestade , ende over~mids der beden ende tfersueken ons liefs ghemins heren ende Gielijs voerghenoemt , soe hebben wij Jan Bau , Gielijs van Overbroec , Jan van Waerloes , Heinrjc van Boxtune ende Godevaert van + der Tanghen manne vorghenoemt onse zeghele ghehanghen ane dese letteren in kennissen der waerheyt . Dit was ghedaen int jaer ons Heren doen men screef dusentegh drie + hondert tsestegh ende viere , des zondaegs nae zente Mathijs dagh in + de maent van sporkille .