Corpus Van Reenen-Mulder (CRM14): Oorkonde K744r35601

Wy Willem de Molennere ende Ramont van + den Werve , scepenen in Antwerpen , maken cont dat vore ons quam een eersam man myn her Jan van Ymmersele , riddere , ende verlide dat hi omme eene summe ghelds daer hi hem af bekinde al vergouden , vercocht heeft wittelec eenen eersamen ende religiosen manne den abdt van den cloestre van Tongherloe tguet van + der Elst ghelegen in + de prochie van Duffle , met allen sinen toe~behoerten , ghelyc dat hyt vormaels ghecreech jeghen heren Philippe van Pollanen , also sij ons seiden , met allen den rechte dat de vorghenomde myn her Jan daer ane houdende was , dwelke vorseide guet de vors_ miin her Jan gheloefde te waerne ende allen vor~kommer af te doene , ende te latene met volre vromen ende jaerscaren ; mede soe heeft gheloeft Godevert van Ymmerse , des vorghenomds miins heren Jans zoene , want men dit vors_ guet van hem houdt als here , dat soe wanneer men den over~here daer ment af houd ghecrighen mach , dat hi dan dit vorseide guet den vors_ abdt ofte den brenghere van derre letteren verscheinsen oft vereighenen sal op eenen ouden Enghelschen sjaers , also dat den vors_ abdt vast ende ghestade sal siin tallen daghen . Ende omme alle dese gheloften wel ende volcomelec te voldoene den vors_ abdt , soe hebben de vorghenomde miin + her Jan ende Godevert siin zoene verbonden ende te pande gheset hen selven ende al + hore guet dat sy hebben oft moghen ghecrighen . In kennissen van desen letteren bezegelt met onsen segelen . Ghegheven int jaer ons Heren als + men screef M CCC vyftech ende sesse , des sondaghs na sente Baven dach .