Corpus Van Reenen-Mulder (CRM14): Oorkonde K774r35301

Wi Jan van Lombeke , Art van + den Broeke , Jan van + den Aemeren ende Peter van Euwen , eyghenghenoete ons heren tshertoghen van Brabant , doen cont allen den ghenen die dese jeghenwordeghe letteren selen zien ende horen lesen , dat voer ons comen siin Leyse Paeps , wijf wilen was Gheeren Paeps , daer God de ziel af hebben moete , met Janne Paeps , brueder Gheren voergh_ haren mombore , die haer in desen saken metten vonnisse was ghegheven , Johannes Paeps , zoene Gheeren voergh_ , Lijsbeth Paeps , dochter des selfs Gheeren voers_ , met Arde van Lyra haren witteghen man ende mombore die haer met vonnisse oec ghegheven was in desen saken , Margriete Paeps des voerghenoemts Gheeren dochter , met Janne den Walsghen haren witteghen man ende mombore die haer oec metten vonnisse ghegheven was in desen saken , ende Kerstine Paeps , dochter des voers_ Gheeren , met Janne Paeps voergh_ haren mombore die haer metten vonnise oec ghegheven was in desen saken ; ende hebben bekent ende verliit dat si wittelike vercoft hebben eenen religiosen man in Gode den abt van onser vrouwen cloestere van Tongerloe , der ordene van Premonstreit , ten ghestichte des bisdoms van Cameric , alle dat rechte ende alle dat eyghengoet , met allen siinre toebehoerten , waer dats gheleghen moch sijn , ochte es dat Gheeren voers_ wittelec ghecoft ende ghecreghen hadde , jeghen Henrike van + der Rivieren , dat die voergh_ Henrike houdende was ende besittende , ocht dat sijn voersaten houdende waren ende besittende , toet Noerderwiic ende daer omtrent , omme een summe van ghelde die him witteleke gheheeleke ende al vergouden ende betaelt es , gheliic alsi voer ons bekent ende verliit hebben , op welke eyghengoet voers_ Leyse , Lijsbeth , Margriete , Kerstine ende elc van hen met sinen mombore voergh_ , ende Johannes voers_ verteghen hebben ende af siin ghegaen bi costumen ende ghewoenten van + den lande , ende den abt voers_ daer toe ghedaen hebben ende ingheerft bi consente ende bevelen ons heren tshertoghen voers_ ende maenisse heren Godevaerts van + der Dilf , ridders , scouthet in Antwerpen , ende wiisdomme der eyghenghenoete voergh_ ; ende daer toe es ghesciet al dat daer ghewoenlec ende sculdech was toe te ghesciene ende en~gheen poent van rechte achter ghelaten , met al selker condicien ende vorwarden , dat die voergh_ abdt ofte brenghere des briefs dit voerghenoemde goet al ende en yeghelike , met allen siinre toebehoerten , gheliic alse voerscreven es , houden , hebben ende besitten soelen toet eweliken daghen rastelike ende vredelike , Leysen , Lijsbetten , Margrieten , Kerstinen ende Johannes voergh_ haren erfghenamen ofte haren nacomelinghen ende gheen recht meer daer in te hebbene , te houdene of te besittene ; ende omme meer sekerheiden ende vestinghe den abtd voergh_ hier op te doene , soe hebben wie onse segle ane dese letteren ghehanghen ; ende bidden eerachten lieden ende bescedenen dat si hare segle metten onsen ane dese letteren hanghen willen alse in gherechter orconden , Heinriken Wiinants , Janne Diederix , Heinrike van + den Hoeghenhuus ende Heinrike Stakenbroecs , scepenen ons heren tshertoghen in Herentals . Ende wi Heinric Wiinants , Jan Diederix , Heinric van + den Hoghenhuus ende Heinric Stakenbroec , scepenen in Herentals voergh_ , omme die bede ende tverzueken onser liever gheminder vriende der eyghenghenoete voergh_ , ende oec allen den partijen voers_ ende want wi oec daer bi mede aen ende over hebben gheweeest , daer alle dese dinghen voerscreven ghevielen ende ghescieden in alder vorwarden alse voerscr_ es , soe hebben wi onse segle ghehanghen metten seglen der eyghenghenoete voergh_ aen dese letteren in kennisse der waerheit ende in orconscapen van allen desen dinghen die hier voer siin ghescreven . Ghegheven in + den jaere ons Heren als men screef dusentech drie + hondert viiftech ende drie , op sente Jacobs dach apostels .