Lijst

Corpus Van Reenen-Mulder (CRM14): Oorkonde K778r34601

Lommel of omgeving, 1346

Wi heinrich scoutet / peter der wedewen zoene . jhan van kattenbossche : mathijs van luttel~lumele . aert clemen zoene . jhan nellen . jhan meerman . scepenen van lumele / doen kont allen den ghenen die desen brief selen sien en_ horen lesen : dat voer ons comen es luetgaert sanders wijf was van lumele / en_ hoere kindere / woe dat si gheheyten siin met namen en_ met toenamen onbedwonghen met hoeren wille / en_ hebben bekeent en_ verliet dat si sculdech siin den goedshuse van postle / vierdaelf mudde rogghen . goet en_ gheue metter maten van lumele op sente andries dach te betaelne . ewelike en_ omm_meer . van kemkens potters erfenisse op alselke onderpande als ghi hoeren suelt . dats te verstane op portermans loecht die achter sanders leet met sinre toebehorten . en_ op portermans loecht dat achter krokaerts leghet . en_ op portermans benne met sinen toebehoerten . en_ op portermans ecker die op die midde~ecker leghet . en_ op portermans ecker die leghet aen die kerke . en_ op portermans ecker die leghet voer smeeds . en_ op twe ziellen beemps op ghelders~horst . en_ op een zille op die echterste riede . en_ op storms ecker . in orconscappe der waerheit wi voerghenoemde scepenen hebben onsen ghemeinen zeghel ane desen brief ghehanghen . Jnt iaer ons heren dusentich drie + hondertich + . ses en_ veertech des sondaghes nae senter claues dach . . . . .