Corpus Van Reenen-Mulder (CRM14): Oorkonde K807r33101

Wi Henric Berthout , here van Duffele ende van Ghele , doen cont alle den ghenen die dese lettere solen sien ende horen lesen , dat wi orlof ghegheven hebben ende noch gheven Wouteren van Uutsole , enen beempt , die es gheleghen te Lemersvelt , die hi becreghen heet tieghen Giliis van Lemersvelt , ende enen beempt die hi becreghen heet tieghen Wouteren van Leemputten , die es gheleghen te Hincderxseem bi de vort , te heinene ende te verslane te allen tide van + den jaere , erflec ende emmermeer , ende omme~dat wi willen dat hem dit vast ende ghestadech blive van ons ende van onsen nacomelinghen , so hebbe wiit beseghelt in kennisse der waerheit . Vort bidde wi onsen liven vrienden den scepenen van Ghele , dat si haren seghel hir + en~ane hanghen metten onsen . Ende omme de bede ons liefts heren , so hebbe wi Gherard die Coene , Woutere Giliis , Willem van + der Hoeven , Henric van Gansvenne , Henric Gastman , Willem van + der Nuermolen , Gherard Pelgrims , onsen ghemeinen seghel hir ane hanghen metten sinen , in orconscape des tieghenwordech briefes beseghelt . Int jaer ons Heren doen men screef &mring; c˚cc ende een en dertech , op sinte Mattheus dach .