Corpus Van Reenen-Mulder (CRM14): Oorkonde K809r31101

Allen den ghenen die dese letteren selen sien ende horen , wi Arnout van Roesbeke , Reinere de Bridere , Diederijc van Oessenic doude , Woutre van Ghele ende Willem van Waesmont , scepenen van Dormale , groete ende bekinnesse der wareit . Cont si igheliken dat ghestaen was vor ons alse vor scepenen dar toe gheroepen , Jan die men seit van Dormale , sone was Gilijs die men hiet Hartscenen , ende kinde ende liede dat hi vercocht hadde erflike den abt ende den covente van Tongerloe hondert capune , letter min ochte meer , ende achte pont , dertien scellinghe ende vire penninghe , met al~selken ghelde te nemene alse onse here de hertoghe van Brabant sinen tseins nemt , vief scellinghe suatter tornoise ende seven scellinghe paiments , al~selcs als in borse gheet . Vort soe quam dese voerseide Jan met sinen laten die dese capune ende desen tseins sculdech waren ende dede lesen enen brief vor ons , dat en droeghen ende kinden op hen selven ende met vollinghen van laten , dat sij desen tseins als~soe sculdich waren als men daer las . Doe dit ghedaen was , doe droech op dese vornoemde Jan dese vornoemde capune ende den tseins vorseit , in allen dien rechte dat hijt houdende was ende ghehouden hadde , bi maennesse Willems die men seit Sporkens , meier van tshertogen renten , ende bi onsen vonnesse den vorseiden meier in de hant te des voerghenoems abs ende tcovents boef , ende vertiech der capune ende tseins vorseit , als~soe dat hi + er en~gheen recht in en behilt . Doe dit ghedaen was , doe ghichte de vornoemde meier den vornoemden abt bi maennesse des vorseits meiers en~de bi onsen vonnesse ende goetdene ende erfdene in de vornoemde capune ende in den tseins vorseit met allen dien capuine ende desen tseins vorseit sal houden dese vornoemde abt ende tcovent van onsen here den hertoghe van Brabant op enen capuen ende ses penninghe tseins . In welker orkenscape wi Arnout van Roesbeke ende Reinere de Bridere vornoemde scepenen bi beden des vorghenoemts Jans ende onser samenscepenen vorseit , soe hebbe wi onse seghele ane dese iegehwordeghe letteren doen hanghen . Ghegheven int jaer ons Heren als men screef m ccc xj , tsondaghes vor sente Andries dach .