Corpus Van Reenen-Mulder (CRM14): Oorkonde K809r31102

Allen den ghenen die dese letteren sele sien ende horen , wi Arnout van Roesbeke , Reinere de Bridere , Diederijc van Oesenijc doude , Woutre van Ghele ende Willem van Waesmont , scepenen van Dormale , groete ende bekinnesse der wareit . Cont sij igheliken dat ghestaen was vor ons , alse vor scepenen ende daer toe gheroepen , dat Jan die men seit van Dormale , die sone was Gilijs dien men hiet Hartscene , ende bekinde ende liede dat hi vercocht hadde den abt ende den covente van Tongerloe hondert capune , letter mien ochte meer , ende achte _ dertijn s_ ende vier d_ , erflech tseins daer hi + se binnen ghegoet hadde ende gheerft alse verre alse recht wijsde , ende sculdech was te doene , met alselker voerwaerden dat die voerseide abt ende tcovent sal heffen ende hebben van desen voerseiden tseinse , den coninx groeten tornoisen van Vrankerike goeden ende gaven ende den ouden voer neghen d_ , al tote een teremte van vieftien jaren durende , waer dat sake dat ons here de hertoghe van Brabant sinen tsiens hier + enbinnen lichtere name , dan den groeten tornoisen goeden ende ouden voer neghen d_ , dat dan Jan voernoemt gheloefde die faute ende die ghebreke alse van dien tseinse op te richtene op die groette die vornoemt es , van den coninc groten tornoisen ; ende om~dat dabt ende tcovent vornoemt te sekere sij , waer dat sake dat gheviele datter ghebreke aen ware , soe heft hen de voerseide Jan ghesedt tonderpande sijn panus int doerpe te Dormale , dat hi helt van + den hertoghe te tseinse , ende heft dat vorseide panus ghelijc dat gheleghen es met dien datter toehoert op~ghedraghen den rechtere in + de hant bi manesse tsrichters , dats te verstane Willems Sporkens , meiers van + der tsertoghen rinten , ende bi onsen vonnesse alse tenen pande tote dien teremte die voerghenoemt es , ende daer op vertheech ; ende alsoe dat hi daer en~gheen recht in en behilt , behoudeleke den vorworden die hier vor ghesproken sijn . Doe dit ghedaen was , doe ghichte ende goedde dese vorseide meier bi maenesse sijns ende bi onsen vonnesse den vorseiden abt in dit vornoemde panus also alst ghelegen es , met allen dien rechte dat daer toe behorende es , op alle die vorwarden die voernoemt sijn , ende als dese teremt van vieftien jaren leden es , soe sal dese voerseide pant quite sijn , ende dese vorseide abt ende coovent soelen haren tsijns heffen ghelijc datten onse here de hertoghe opheft . In welker oerkenscape wi Arnout van Roesbeke ende Reinere de Bridere vornoemde scepenen , bi beden des voernoemts Jans ende onser saemscepenen voerseit , want si en~gheene seghele en hebben , soe hebbe wi onse seghele aen dese ieghenwordeghe letteren doen hanghen . Ghegheven int jaer ons Heren als men screef &mring; ccc xj , tsondaghs vor sente Andries dach .