Corpus Van Reenen-Mulder (CRM14): Oorkonde K809r31501

Wi Henric Berthaut , here van Duffle ende van Gheele , riddre , maken cont allen den ghenen die dese letteren sien ochte horen lesen , dat comen es voer ons , voer Beatricen van Rotselaer onse witteghe wiif , voer onse manne , voer onse scepenen ende voer vele goeder liede , die daer toe sonderlinghe waren versament , her Arnout die men van + den noemt Cruse , parsoen van + den beghinen van Dyest , priestre , ende hevet bekint ende verliet . dat hi wetteleke hevet vercocht Ghisebrechte die men heet Bac van Tilborh te gheesteliker liede behoef heren Hubrechts dsabts ende tsconvints van Tongerlo van + der ordinen van Premonstreit , alle dat ghoet dat hi hadde ende houdende was van ons , dat in die parochie van Veerle ende daer omtrent gheleghen es , beide leen ende erve dat men noemt tgoet te Dunghen , elc bundre van dien ghoede om neghen ende viertech scellinghe goeder ouder groeter Turnoise vans conincs munte van Vrankerike , ende dat hi hevet opghedraghen in onse hant dat leen bi maninghen ons ende bi wiisdome onser manne ende dat erve oec bi onser manessen ende bi wiisdome onser scepenen die daer op sculdech waren te wisene ; ende hevet op al dit goet verteghen ende daer toe ghedaen al dat hi sculdech was te doene , na vonnesse ende na recht ; ende dat hi hevet ghelovet dat hi den voer~ghenoemden Ghisebrecht dsabs behoef ende tsconvints voerseeght van + den verghenoemden goede sal doen gherechte waernesse , jaer ende dach , jeghen alle die ghene die hen daer toe rechts vermeten ende te rechte willen staen ; ende dat her Arnout voerghenoemt hevet bekint dat hem Ghisebrecht voerseeght dat ghelt dat dit voerghenoemde goed coste na die ghelande dat quam draghende , wittelike ende volcomelike heeft betalt in goeden ghetelden penninghen ; ende dat her Arnout voerseeght hevet quite ghescouden den voerseeden Ghisebrecht van al den ghelde voerghenoemt ; waer + bi dat wi den voerseeghden Ghisebrecht dsabs behoef ende tsconvints van Tongerlo voerseit , dit voerghenoemde leen hebben verervet met den anderen erve voerseit , ende hebben hem al dit voerghenoemde goet ghegheven in gherechten erve ; ende al bi onser maninghen ende bi wiisdome onser manne ende onser scepenen , die daer op sculdech waren te wisene op tuee ende twintech scellinghe ende ses penninghe ludslachte jaerliics tsiins , ende op enen grawen winter~roc ons ende onsen nacomelinghen alle jare eerflic ende emmermeer te ghevene . Doen dit ghedaen was , doen begheerde hem Ghisebrecht voerseeght des ghoeds te utene dsabs behoef ende tsconvints van Tongerlo voerghenoemt , waer + bi dat dese Ghisebrecht bi onser maninghen ende bi wiisdome onser scepenen die daer op sculdech waren te wisene , opdroech in onse hant dsabs behoef ende tsconvints van Tongerlo voerghenoemt , al dit voerghenoemde ghoet met al sinen rechte ende met warnessen jaer ende dach voerseght , ende verteech daer teenden op al dit ghoet na dat vonnesse ende recht wiisde . Doen dit ghesciet was , doen erveden wi heren Hubrechte den abt van Tongerlo voerghenoemt , die daer selve ieghenworden was , in al dit voerghenoemd ghoet tsinen behoef , siins convents ende siins godshuus , ende ghaven hen bi maninghen ons ende bi wiisdome onser scepenen die daer op sculdech waren et wisene al dit voerghenoemde goet in gherechten erve , ewelike ende emmermeer , erfleec te behoudene ende te besittene , op enen grawen winter~roc ende op tuee ende twintech scellinghe ende ses penninghe ludslachte voerghenoemt ons ende onsen nacomelinghen te ghevene elcs jaers op dien selven dach dat wi den voerghenoemden abde ende convente van Tongerlo sculdech siin va + der tienden van Rethie elcs jaers te ghevene tuee ende twintech scellinghe ende ses penninghe dier selver payen ; ende in manieren dat wi elcs jaers den eenen tsiins met den anderen selen staden onderlinghe sonder begriip , ende den winter~roc te ghevene elcs jaers te dien tiden dat men ghewoenlike winter~rocke pleghet te ghevene sonder begriip . Ende hier mede gheloven wi voer ons , voer onse hoir ende voer alle onse nacomelinghe quite te houdene ende scelden quite den abt ende tconvint van Tongerlo voerghenoemt van al den tsiinse die op dit ghoet tevoren stont , ende van beeden , van corwyden , van gysten , van ghasterien , van coste , van alrehande versoeke soe ghenoemt soe onghenoemt , ende van alrehande dienste ende van alrehande rechte , dat dit voerghenoemde ghoet was ochte namaels mochte siin schuldiich ons ende onsen nacomelinghen . Ende wi gheven oec ende bekinnen den abde ende den convinte van Tongerlo voerghenoemt dat hare boden die van haren weghen op dit voorseeght ghoet selen sitten ende wonen , niet en selen hebben te doene noch ghehouden siin met en~gheenrehande kerckghebode , die men van onsen weghen ochte onser nacomelinghe sal ghebieden , maer waer dat zake , dat overdat ghesciede binnen onsen lande , dan mocht + men + se te haren huse op dit goet met namen ontbieden binnen der parochien van Veerle ende niet voerder om te tughene na lands recht ende dan sal + men + se ontcommeren hastelike te haren minsten letsele . Voert gheven wi ende bekinnen den abde ende den convente van Tongerlo voerghenoemt al dat recht dat wi hebben ane al die vischerie in die Lake ende in die Vliet , hoe sie leghet ochte ligghen mach , ochte hoe dat ghenoemt si , beghinnende ane haer goet te Vorst ende gaende totte ane dit goet voerseit , ende van desen goede voert doergaende alsoe verre alse dit goet gheleghen es , behoudelike elken sinen rechte die dat toent gheliic dat hi sculdech es te toenene . Ende alle dese pointen voerseeght gheven wi ende bekinnen den abde ende den convente van Tongherlo voerghenoemt , behoudelike altoes onsen gherechten onser heeryen ende onser vooghdien van desen goede voerghenoemt . Over dese voerwarden waren broeder Henric prioer van Tongerlo , her Symon persoen van Meerhout , broeder Jan prochiaen van Tongerlo , Claus van + den Mortere , Wouter van Loye onse drossate , Ghisebrecht Bac , Arnout Berthout siin broeder , Giliis van Poederle , Gherart van + den Bruekele , Jan Bruuns , Jan Veken , Jan Banvelt , Gieliis Meys ende Jan van Oesterle , onse manne , Henric van + der Reehaghen , Willem van + den Kerchove , Jan van + den Boegarde , Heyne Wellens van + der Slusen , Emele van Hane~Venne , Henric van + der Hoeven ende Symoen van Ouderdonc , onse scepenen van Veerle , ende ander vele goeder lide . In orconscape ende vestinghen van allen den pointen ende voerwarden voerghenoemt hebben wi onsen seghel ane desen brief ghehanghen . Ende om die meerer sekerheit bidden wi onsen mannen ende onsen scepenen van Veerle , voerghenoemt , dat si desen brief willen mede beseghelen ochte voer hen doen beseghelen . Ende wi Giliis van Poederle , Gherart van + den Bruekele , Jan Brims , Jan Veken , Jan Banvelt , Gieliis Meys ende Jan van Oesterle voerghenoemt , manne van ons liefs heren van Duffle voerghenoemt , omdat wi gheene propre segle en hebben , bidden wi onser liever vrouwen ver Beatricen van Rotselaer , vrouwen van Duffle voerghenoemt , dat si haren seghel wille hanghen voer ons ane dese letteren . Ende wi Henric van + der Reehaghen , Willem van + den Kerchove , Jan van + den Boengaerde , Heine Wellens van + der Slusen , Emele van Hanevenne , Henric van + der Hoeven ende Symoen van Onderdonc , scepenen van Veerle voerghenoemt , omdat wi ghenen propren seghel en hebben , bidden onse vrienden den scepenen van Gheele , dat si voer ons desen chartre willen mede beseglen met haren ghemeenen segle . Ende wi Beatriis van Rotselaer , vrouwe van Duffle voerghenoemt , om beeden wille der voerghenoemder manne , ende om~dat wi loven ende consenteren al dat in desen brief bescreven es , hebben onsen seghel oec ane desen brief ghehanghen . Ende wi Gherart van Sammale , Heme van + den Rode , Jan die Gouwere , Willem van Leecs , Willem van den Rode , Willem van den Hoeven , ende Gherart Pelegriins , scepenen van Gheele , om beeden wille onser liever vriende der scepenen van Veerle ende in orconscapen der waerheit , hebben onsen ghemeenen seghel mede ane dese lettren ghehanghen . Ende wi Henricc Berthaut voerghenoemt , om noch die meere sekerheit , bidden edelen lieden minen her Florense Berthaut , here van Mechelen , onsen lieven here ende minen her Janne Berthaut die men heet van Berlaer , here van Kerberghen ende van Helmont , onsen lieven neve , riddren , dat haer seghele met den onse ane dese letteren willen hanghen Ende wi Florense Berthaut , here van Mechlen ende Jan Berthaut , here van Kerberghen ende van Helmont , riddren voerghenoemt , ons beden wille miins her Henrics Berthaut ons lieves neven voerghenoemt , hebben onse segle met den sinen ane dese chartre ghehanghen in orcontscape der waerheit . Ende wi Henric Berthaut voerghenoemt begheren voert ende willen waer dat sake dat enech van desen seghelen der gherre dien wiis hebben ghebeden ane dese letteren niet ghehanghen en woerde , ochte ghebrake , dat overmids dat die cracht ende die vertut van desen lettre niet en si ghemindert . Dit was ghegheven ende ghesciet int jaer ons Heren doen men screef dusentech drie hondert ende vieftiene , op den dondersdach na alder heileghen messe .