Corpus Van Reenen-Mulder (CRM14): Oorkonde K809r31502

Wi Heinric Berthaut , here van Duffle ende van Gheele , riddre , maken cont allen den ghenen die dese letteren selen sien ochte horen lesen , dat wi bi rade Beatricen van Rotselaer , ons wittechs wiifs , onser manne , onser scepenen , ende vele goeder liede die daer toe sonderlinghe waren versament , eene vriendelike ende payslike ordenantie ende vorwaerde hebben ghemaect tuschen ons ende heren Hubrechte den abt ende tconvint van Tongerlo , van + der ordenen van Premonstreit , omme ane te legghene allen tuist ende alle kalangie die tuschen ons ende den voergheseiden abt ende tconvint van Tongerlo hevet gheweset ochte namaals wesen mochte , alse van + den pointen die hier na bescreven siin . Van welken pointen wi ierstwarf bekinnen dat abt ende tconvint van Tongerlo voerghenoemt gherecht ghifteren siin van + der capelle sente Pieters van Rethie , want die capelle behoert ter prochikerken van Rethie daer af siin gherecht patroen . Voert gheloven wi den laten dsabs ende tsconvints voerghenoemt weder te ghevene al dat goet dat wi hen hadden ghenomen , dats te verstane , vier bundre die te Werbeke gheleghen siin , lettel min ochte meer , want dat goet es eyghen dsabts ende tsconvints voerghenoemt , ende tsiins~goet der voerghenoemder late . Voert kinnen wi dat die late die te Rethie , te Werbeke ende te Hamme ochte elwaer opt eyghen dsabts ende tsconvints van Tongerlo buucvast moghen sitten , ne~gheene beede selen ghelden met onsen lieden , ende alsoe gheliic so , ne selen onse liede , die onder ons buucvast moghen sitten , ne~gheene beede ghelden met den laten dsabs ende tsconvints van Tonguerlo . Ende die ghemeene gheseten siin , beide opt onse ende opt eyghen dsabs ende tsconvints van Tongerlo , selen gheven halve beede met onsen lieden , die redenlike ende wesenlike , si na ghelande van den goede dat si onder ons moghen hebben ligghende . Ende alsoe gheliic selen si oec gheven halve beede met den laten van Tonguerlo , die redenlike ende wesenlike si , na ghelande van den goede dat si moghen hebben ligghende onder den abt ende tconvint van Tongerlo voerghenoemt . Voert kinnen wi dat dabt ende tconvint van Tongerlo voerghenoemt selen gheven die costerie van Rethie altoes des eens jaers ende wi ende onse nacomelinghe altoes des anders jaers , ende altoes alse ons ende onsen nacomelinghen die costerie behoren sal te ghevene , selen wi die costerie gheven iemanne , dies werdich si sonder arghelist . Voert kinnen wi dat dabt ende tconvint van Tongerlo voerghenoemt , onse scepenen van Oevele , die nu siin ende die wi ende onse nacomelinghe daer selen setten , moghen manen alse rechteren bi dien eede dien si daden ochte selen doen , alse si ons scependoem suoeren , ochte ons ende onsen nacomelinghen sele sueren ; ende dat si met hen moghen dinghen ende ghedinghen , oefenen ende hanteren , dasts te verstane op hare late die si vercreghen jeghen minen heren Janne Berthaut ende minen heren Janne sinen sone ; ende recht gheven ende recht nemen met hen , in allen tiden als siis begheren , ute~ghesproken allene dien tide alse wi onser scepenen voerghenoemt hebben te doene omme te dinghene van hoghen saken . Voert kinnen wi dat dabt ende tconvint van Tongerlo voerghenoemt hebben van haren laten van Oevele voerghenoemt eeden , scatscout , erven , onterven ende alle ghebuerleec gherechten , dats te verstane : koere , orlof ende alle gherechten ende alle boeten , soe ghenoemt , soe onghenoemt , die verscinen moghen tote der sommen van drien scellinghen , ende dat si daer af moghen ontfaen forfaiten ende boeten also dicke alsi verscinen tote der sommen van drien scellinghen voerghenoemt , behoudeleec altoes al haren chartren die voermaels hier op ghemaect siin . Voert kinnen wi , dat wi ende die voerghnoemde abt ende tconvint van Tongerlo van al dien rechte dat wi ochte si hebben in scouwinghen van tunen ende van waterlaten binnen Oevele , siin bleven gheheelechleec in minen heren Rogiere van Levedale riddere , onsen lieven neve , ende hebben ghelovet in beiden siden vaste ende ghestadech te houdene al dat hi daer ute sal segghen , ochte met sinen openen letteren gheseghelt met sinen segle ut~hanghende , bescriven na tbegriip van + den chartren voerghenoemt . Voert kinnen wi dat die late van Oevele dsabs ende tsconvints voerseegt , die si houdende waren , voer dese voerghenoemde late die gheheeten siin doude + late , sculdech siin te comene te Tongerlo alse te haren hove , en dat si behoren tallen dien rechte dat hare andre late behoren die binnen Tongerlo siin gheseten . Ende al dese pointen voerghenoemt bekinnen wi ende verlien den voerghenoemden abt ende convente van Tongerlo ende begheren ende willen dat van nu voert tuschen ons ende onse nacomelinghe van + der eerre side , ende den voerghenoemden abt ende convint ende haer nacomelinghe van + der ander side , blive ghestadech pays ende vrienscap ewelike ende emmermeer . Over dese ordinantie ende voerwaerde waren broeder Henric , prioer van Tongerlo , her Symon , parsoen van Meerhout , broeder Jan prochiaen van Tongerlo , Claus van + den Mortere ende Gieliis van Ruunst , Gieliis van Poederle , Jan van Casterle , Gherart van + den Bruekele , Jan van Baantvelt , Daneel die Vorstere ende Gerart Mayenbosch , onse manne , Gherart van Sammale , Heyne van + den Rode , Jan die Gouwere , Willem van Leecs , Willem van + den Rode , Willem van + der Hoeven ende Gherart Pelegriins , onse scepenen van Gheele , ende ander vele goeder lieden . In orcontscapen der waerheit ende in vestinghen van allen desen hebben wi onsen seghel ane desen chartre gehanghen . Ende om die meerre sekerheit bidden wi onsen mannen ende onsen scepenen van Gheele voerghenoemt , dat si desen brief mede beseghelen ochte voer hen doen beseghelen . Ende wi Gieliis van Poederle , Jan van Casterle , Gherart van + den Bruekele , Jan Baanvelt , Daneel die Vorstere ende Gherart Mayenbosch , manne ons lieven heren van Duffle voerghenoemt , omme~dat wi gheene propre segle en hebben , bidden onser liever vrouwen ver Beatrisen van Rotselaer , vrouwen van Duffle voerghenoemt , dat si voer ons haren seghel ane dese letteren wille hanghen . Ende wi Beatriis van Rotselaer , vrouwe van Duffle , voerghenoemt , om beeden wille der voerghenoemder manne ende omme~dat wi loven ende consenteren al dat in desen brief bescreven es , hebben onsen seghel mede ane dese letteren ghehanghen in orconscapen der waerheit . Ende wi Gherart van Sammale , Heyne van + den Rode , Jan die Gouwere , Willem van Leecs , Willem van + den Rode , Willem van + der Hoeven ende Gherart Pelegriin , scepenen van Gheele voerghenoemt , ome beeden wille ons lieves heren van Duffle voerghenoemt , hebben onsen ghemeenen seghel ane dese chartre ghehanghen in ghetuchnessen der waerheit . Ende wi Henric Berthaut voerghenoemt omme noch die meerre sekerheid , bidden edelen lieden minen her Floreinse Berthaut , here van Mechelen , onsen lieven here , ende minen her Janne Berthaut , die men heet van Berlaer , here van Kerberghen ende van Helmont , onsen lieven neve , riddren , dat si hare seghele met den onsen ane dese chartre willen hanghen . Ende wi Floreins Berthaut , here van Mechelen , ende Jan Berthaut , here van Kerberghen ende van Helmont , riddren voerghenoemt , om beeden wille miins her Heinrics Berthaut ons lieves neven voerghenoemt , hebben onse segle met den sinnen ande desen brief ghehanghen in orconscapen der waerheit . Ende wi Heinric Berthaut voerghenoemt begheren voert ende willen , waer dat sake dat enech van den seglen der ghene dien wiis hebben ghebeden ane dese letteren niet ghehanghen en worde ochte ghebrake , dat overmids dat die cracht ende die vertut van desen letteren niet en is ghemindert . Dit was ghegheven ende ghesciet int jaer ons Heren doen men screef dusentech drie + hondert ende vieftiene , op de donders~dach na alle der heylighen messe .