Corpus Van Reenen-Mulder (CRM14): Oorkonde K809r31503

Allen den ghenen die dese letteren selen sien ochte horen lesen , Hubrecht , bi de ghehinkenessen ons Heren , abt van Tongerlo , van der ordenen van Premonstreit , saluut ende kinnesse der waerheit . Wi doen u cont dat wi met groter voersinnecheit ende met onsen ghemeenen consente omme orboer ons ende ons goodshuus hebben over~een~ghedraghen met eenen edele man , minen her Heinric Berthaut , here van Duffle ende van Gheele , riddre , alse van pointen daer tuist af was tuschen hem ende ons , gheliic dat bescreven es in eenen chartre die daer op es ghemaect ; ende gheloven voer ons ende voer onse nacomelinghe , dat wi minen her Heinricke Berthaut voerghenoemt ende sinen nacomelinghen selen houden emmermeer vaste ende ghestade alle die pointen ende vorwarden die in den voerghenoemden chartre bescreven siin , gheliic dat si daer begrepen siin , ende gheliic dat miin her Heinric Berthaut voerghenoemt in dien selven chartre ghelovet voer hem ende voer sine nacomelingen ons weder te houdene vaste ende ghestade emmermeer , al dat in den voerghenoemden begrepen es , van welken chartre die teneur ende tbegriip van worde te worde hier na bescreven es , in der manieren doe hier volght . (onleesbaar) (onleesbaar) (onleesbaar) Ende wi abt ende convint van Tongerlo voerghenoemt , omdat wi loven ende censenteren al dat in den voerghenoemden chartre begrepen es , ende om~dat wi willen ende begheren dat dat ewelike vaste ende ghestadech blive in allen siden , hebben wi onse segle ane dese letteren ghehanghen in orconscapen ende in vestinghen van allen desen . Ende om die meerre sekerheit biddem wi onsen werdeghen vader ende here heren Godevarde den abt van sente Michiels van Antwerpen , dat hi sinen seghel wille hanghen ane dese letteren . Ende wi Godevart , bi der godliker ghehinkenesen abt van sente Michiels van Antwerpen , om beden wille dsabs ende tsconvints van Tongerlo voerghenoemt , hebbe onse seghel ane desen brief ghehanghen . Dit was ghegheven ende ghesciet int jaer ons Heren dusentechs drie + hondert ende vieftiene , op den dondersdach na al + der heileghen messe .