Corpus Van Reenen-Mulder (CRM14): Oorkonde K809r31601

Wi Bauderic Heinric van + der Houtmarct , Heinric van Vorst , Jacob Scardenberghe , heinric na ghescreven siin , wilcoerde ende woude openlike dese selve her Arnoud persoen , dat alsoelc omberuerliic goet , dat men heet eerfnesse , als hi haudende was , dat quam van + den rurende ziden Goeswins ende Arnouds voerghenoemt , ende dat noch onbetimmert was ende niit op ghemaect noch beseet , zoude aen~vallen ende bliven na doet heren Arnouds voerghenoemt , den voerghenoemden Goeswinen ende Arnoude ende herre partisen , alse gheliic alse van rechte van + den lande ende van gheboerten hen sculdech te blivene , ute~ghenomen Janne van Rommershoven , welken Jan die selve persoen ute~sciit ende woude dat hi en~gheen recht in dit goet hebben en zoude ende overmidts die gheloefden Goeswiin ende Arnoud voerghenoemt voer hen zelven ende voer alle hoer partise die spersoens goede gheboertech weren ocht siin moghten , dat + si alle die gichten , alle die coepe , alle wissele , alle zeerdinghen ende alle verandren in wat maniren dasse her Arnoud persoen voerghenoemt voermaels ocht na~deen zoude van sinen goede , wat goede dadt ware , erve , leen , eighen ocht have , ochte scout , di + men heme sculdech waere , vast ende ghestadech hauden zonder ende nimmermeer daer ieghen comen overmidt hen selven ocht andre , ende vast ende ghestadech doen hauden ende procereren doen te haudene alle den ghenen ende igheweelken die na haren partisen waren gheboertech te diis selves persoens gode , so~dat siir deel of eisschen moghten , ende waer oec dat sake dat di selve ochte iman van haerere partisen voerghenoemt dien deel in dit goet behoeren moghte heme piinde te belettene die ghichten , die coepe , die wisselinghen , die settinghen ende veranderen , daer voer af + ghesproeken es , ocht einech van allen desen ocht daer ieghen quamen ocht daden ocht leidenesse zochten in eighen maniren , wie dat ware overmits hen selven ocht ander so woude dat her Arnoud persoen voerghenomet ende beval dat de ghene diir ieghen quamen , waerre een waerre meer van dan vordane nimmermeer recht en sheen en hadde ocht en hadden in einich deel van desen onbequaemden goede daer voer af ghesproken es , maer dat deel dat heme behoeren zoude , sal van dan vordane aen~vallen ende aen~wassen Goeswine ende Arnoude voerghenoemt , gheliic dadt vercleert worde van den ghenen die van hoerre partisen ware , den ghenen mede te weerne die ieghen dese stucken quamen die voerghenoemt siin ende mede tontheffene ende te bescuddene heren Janne van + der Lynden daeken van sinte Jans te Dyst , Arnoude Pouwels ende Wouteren Tayten , worden si gheleet ocht ghestoert in eighen maniren in die ghichte die hen her Arnoud persoen voerghenoemt heef ghedaen van zine ghereden haven ende van ziir scout di + men hem sculdech was . Ende tallen desen pointen voerghenoemt ende teilken sunderlinghe vast ende ghestaddech te houdene eweliic ende te volbreinghene , so verbonden hen ende verwilcoerden die voerghenoemde Goeswiin ende Arnoud ende eelc van hen beide op siin trouwe ende op siin weet ende siin manwaerheit ende met eede ghesworen bi Gode ende bi alle heilighen ende voeremeer op enen panduen van dusent ponden suarten tornose , half den besscop van Ludeke , ende half den here van Dyst , welke panduen Goeswijn ende Arnoud voergheseit ende elc van hen gheheel gheloefden te vergheldene , worde het verclaert ende altoes sonder arglijst te sukene in einech van dese pointen voerghenoemt , ende voertmeer gheloefde daer bi harre trouwe Marie , Arnouds zuster van Rommershoven voerghenoemt dat si alle dese pointe die voer ghescreven siin hauden sal vast ende ghestadech ende nimmermeer daer ieghen comen overmidts haer zelven ocht andere persone . In orconscap der waerheit hebben onse seghele aen desen brief ghehanghen . Dit ghesciede int jaer ons Heren als + men screef M CCC ende vieftiene , neghen daghe in April .