Corpus Van Reenen-Mulder (CRM14): Oorkonde K809r32301

Allen den ghenen die dese lettre selen sien ende horen lesen , wi Adaem van + der Berct , Willem van Halbunre , Arnoud Rogghen , Herman Dsweerds , Jan van + der Voort , Rutgheer van + den Donc ende Wouter Somerman , scepene ons lieves here van Diest ende van Haelem ende Gosuiins dsvooghs in Meerhout , saluit ende kenesse der wareit . Ons es wel kont in der waerheit ende bi anebringhen ende ghetughe der late ghemeenleec van radenghen ende wi doen u voert cont , dat in eenen tiede voerleden , Vranke van Hoeberghen den abde ende den convent van Tongerlo , van + der ordenen van Premonstreit , van + den bisdoeme van Cameric , vercochte erfleec een bundre beemde geleghen in + de eyghen van Meerhout , bi Eismaers bosch , omme eene sekere somme van penninghen die hem volcomeleec es betaelt , ende met vorwaerden , dat dabt ende tconvent voerghenoemt selen houden ende besitten dat voerghenoemde bundre op sinen bloeten tsijns , sonder alle ander kommer van scotte , van lotte ende van allen dienste ende rechte , dat ute desen bundre sal gaen ochte moghen gaen ; waer + bi daer dabt ende tconvent voerghenoemt in alderre maniere worden ghedaen te dien goede bi eenen werenleken ende onversterfleken laet ende gevriet op sinen bloeten chijns , ende Vranke voerghenoemt obligeerde ende verband alle sine andre goede die hi tier tijt houdende was , die daer + toe goet genoech waren ende noch sijn te dragen alle scot ende lot ende allen dienst die ut dien bundre gaen sal , ochte sal moghen gaen . Alle dese dingen ende iegeliic van hen siin gedaen ende ghesciet met rechte ende met vonnesse , ne~gheen point van rechte achter~ghelaten voer die ghene ende met den ghene dien met rechte toe~behoerde hier over te sine , ende sonderlinghe met consente tsheren van Diest ende Goswiins dsvoogs voerghenoemt , ende na de begheerte Vrancs voerghenoemt . In orkenscape van allen desen hebbe wi scepenen voerghenoemt onsen ghemeenen seghel aen dese lettre ghehanghen . Gedaen int jaer ons Heren M CCC twintech ende drie , op den neghentiende dach van Aprille .