Corpus Van Reenen-Mulder (CRM14): Oorkonde K809r32501

Wy Woutere , Jan Hels , Jan Heren Wouters , Woutere van + den Putte ende Jan van + den Kerchove late van Endout , doen cont allen den ghenen die dese lettere selen sien ende horen lesen , dat voer ons es comen Yde Schelkens van Endhout , dat si gheset heft ende ghekent met vonnisse ende met rechte , gheesteleken lieden den convente van Tongherloe , ellef penninghe eins sjaers op alsuelc goet alse si heft binnen Endout ende met orbore jonckeren Heinrics van Duffele here ende van Ghele ; ende oec met vorwerden wanneer dat die persoen van Merout die nu persoen es niet langhere en es , dat dan die vorsede Yde die ellef penninghe sjaers den goetshuse bewisen sal , op twee bondere lans die de persoen houdende es sinen levedach ende doen van heren goede tote Endout ; ende daer mede sal kome tgoets~huis van Tongherloe laeten ghepaien ende ghenoghen , want ons dese vorwerde cont es ende wire over gheweest hebben ende ons in beiden partien ghebeden hebben , ende wy en~ghenen seghel en hebben , so bidde wy onse lieven vrinden den schepenen van Ghele dat si ons lenen horen seghel te derre tiet . Ende wij Gerart de Tone , Willem van + den Honen , Henrick van Gansevenne , Willem van Hoelvenne , Wouter Soels , Symoen van Etsole ende Jan die Visschere , schepenen van Ghele , om bede wille der late van Endout ende si ons dese vorwerde cont ghedaen hebben , also verre alse si ende wy daer af vindere ende wisere sien , so hebbe wij hon gheleent onsen ghemeinen seghel in orconscape der waerheit . Ghegheven in jaer ons Heren doe + men screef &mring; ccc˚ ende xxiii&jring; , des anders daghes binnen Aprille .