Corpus Van Reenen-Mulder (CRM14): Oorkonde K809r32502

Wij Henric Berthaut , here van Duffele ende van Ghele , doen cont allen den ghenen die dese letteren solen sien ende horen lesen , dat voer ons es comen Dideric die + men heet die Hollandere ende ghelijt ende ghekent dat hi sculdech es gheesteliken lieden den abd ende den convente van Tongherlo erfeleke ende ommermeer vief penninghe lovensche oude sjaers , twe schellinghe jaerbeden sjaers , een ouden groten tornosen der munten sconincs van Vrankerike sjaers , ende neghen penninghe lovensche oude sjaers van roghet rechte ende alle dit te ghildene alle jaer op sinte Mertens dach binnen winter in Tongherlo den vorseden abd ende sinen nacomelinghen ; ende voer alle desen scijns ende recht voerghenoempt heft dese vorsede Dideric den vorseden abd ende sinen nacomelinghen gheset te enen eweleken onderpande een stucke lans gheleghen ten Houte binnen der prochien van Ghele , gheheten Dberkstucke , houdende omtrent drie zillen luttel meer ofte min , dat hi van ons te lene houdende es , in welken onder~pant brueder Woutere van Vorst , profes van Tongherlo van abds ende convente weghen voerghenoempt toe~ghedaen es met manissen ons met wiisdome Arnoud Neten , Arnoud Maes ende Andries die + men heet Menneken , die daer sculdech waren over te wisene , ende en~gheen poent van rechte achter blevene , ende in maniren ware dat sake dat dese vorsede Diederic ofte sine nacomelinghe den vorseden abd , den convente ofte horen nacomelinghen desen vorghenoemden scijns ofte recht jaerlichs niet en gaven ten daghe die vore ghescreven steet ofte in eneghen dele ghebrake , dat dan voert om~mermeer dat die vorghesede abd ende convent die nu sijn ofte tien tide wesen soelen , sonder weder~segghen van ons ofte van iman el hore hande solen slaen moghen vrilike ane dien vorseden onderpandt , ende dies ghebruken alse horen propren goet na horen vrien wille , behoudeleke allene onsen leenrechte in dien sekeren onderpant . In orconscape van alle desen hebbe wij onsen zeghel ane dese lettren ghehanghen ; ende wij Arnoute Neten , Arnout Maes ende Andries die + men heet Menneken , manne Henrics ons lives heren voer~ghenoempt , omdat wij en~ghene propre zeghele en hebben , bidden onsen lieven vrinden den scepenen van Ghele dat si ons lenen horen zeghel te derre tijt ; ende wij Gherart die Cone , Henric van Gansevenne , Willem van + der Hoeven , Willem van Hoelvenne , Davist van Hartbosch , Willem van + den Rode ende Wouter Soels , schepene van Ghele , om beden der vorseder man ende in orconscape der waerheit , so hebbe wijt beseghelt met onsen ghemeinen seghele . Ghegheven int jaer ons Heren doe + men screef M˚ CCC˚ ende viv en twinthech , opten dinsen~dach na sinte Lucien dach .