Corpus Van Reenen-Mulder (CRM14): Oorkonde K809r33601

Wi Wouter , bi + der ghehinkenisse ons Heren abt ende tconvint van Tongerlo , doen cont allen den ghenen die desen brief selen zien ende horen lesen , dat wi van Willeme Lensen zone van Breda ende van sinen samenwrechte Janne uten Houte hebben ontfaen ende onderhoudende ziin in onser hoede eene opene lettre gans gheheel ende onghearghert , met ons liefs heren tshertoghen van Brabant groeten zegle besegelt , begripende van worde te worde al~dus : (onleesbaar) (onleesbaar) (onleesbaar) Ende bi dien dat wi , abt ende convint vors_ , tonsen behoef ende tons godshuis eweliic ende erfliic witteleec hebben vercreghen yeghen Janne uten Houte ende Willeme Lensen sone vorseit , die helft al dorgaens van al den vorghenoemden goeden , so es vorwaerde dat wi de vorghenoemde lettre altoes selen hebben ende onderhouden tot onsen behoef ende ons godshuis van Tongherlo ende onser nacomelinghe , ende oec also wel tot behoef Jans ende Willems vorseit ende haerre nacomelinghe , in manieren dat tallen tiden als men behoeven sal die vorghenoemde lettre te toenen of te vueren ygherinx binnen Brabant , so sal onse bode die selve lettre vueren ende toenen in onsen anxt alleene , ende als dit es te doene om te bescudden alle de goede vorseit int ghemeine , so sal + se onse bode vueren ende toenen op ghemeinen cost ons ende Jans ende Willems vorseit , ende als het te doene es om te bescudden yemans aendeel sonderlinghe in desen goeden , so sal + se onse bode vueren ende toenen op des gheens cost alleene dies ons versuect , ende sonderlinghe behoeven sal der lettre vorseit , maer als + men behoeven sal de vorghenoemde lettre te toe?en buten Brabant , so sal onse bode de selve lettre vueren ende toenen ende wederbringhen , beide in anxt ende in cost des gheens of der gherre die de lettre sal of selen behoeven daer te toenen , so int ghemeine , si yemans sonderlinghe , so dat wi ymmer selen siin ende bliven eweliic houdere der lettre vorseit ; voert es voerwaerde waer dat sake , dat Jan of Willem of hare nacomelinghe vorseit eeneghen cost of scade hadden teneghen tiden , overmids van dien dat wi die vorghenoemde lettre als wiis versocht waren niet en daden vueren ende toenen na der voerme ende maniere voerghescreven , dat wi dien cost ende scade selen verstoeren ende op~rechten volcomeleec den ghenen diese hier omme hevet ghehadt , ende al in goeden trouwen ende sonder arghelist . In orconscap van desen hebben wi onse segle ane desen brief gehanghen . Gegheven int jaer ons Heren dusentech drie hondert ende sesse ende dertech , des maendaghes voer sente Lucyen dach .