Corpus Van Reenen-Mulder (CRM14): Oorkonde K809r35201

Cont zi allen den ghenen die dese letteren yegewordech sien seelen ende hoeren lesen , dat wi Art van Wesemale die men seet van den wiere , heere van Holede , ende Margrite van Meldert , vrouwe van Vorst onse witteghe wiif , om onste die wi draghen tonser zoeter vrouwenen ende tot den godshuse van Tongerlo , gheven ende ghegheven hebben den vors_ godshuse van Tongerlo vore ons ende onser vriende ziele dat cleyne wierken op den art gheleghen binnen der voghdie van Molle , ende een eusel gheleghen boven dat wierken , met al dien dat ten vors_ wierkine ende eusele toe~behorende es , erfleec ende emmermeer te brukene ende te besittene paisleke zonder storen van ons oft van onsen nacommelinghen . In orconscap des ende dat de vorscrevene dinghe vast ende gestadech zolen siin + , so hebben wi onse propre zegle ane dese yeghewordeghe letteren ghehanghen . Ghegheven int jaer ons Heeren doe men screef dusentech drie + hondert twee ende viftech , thalf Aprille .