Corpus Van Reenen-Mulder (CRM14): Oorkonde K809r35601

Allen den ghenen die dese jeghenwordeghe letteren zien selen ende horen lesen , Godevart van Ymmersele , groet met kennisse der waerheit . Cont si allen luden dat voer ons ende den mannen hier onder bescreven quam ende es comen in properen persone , her Philips van Polanen , riddere , onse man , begherende hem tonterven van + den goeden gheheten Ter Elst , gheleghen in + der parochien van Duffle , met allen ende en yegheliken sinen toebehoerten , niet uut~ghesceden ghelijc hi dat van ons houdende was in enen rechten leene tote des gheens behoef die dat vercreghen heeft , waer op wi maenden Janne van Euwen onsen manne , hoe dat wi van rechte dat sculdech waren te doene ; die~welke Jan uut~ghinc ende beriet hem met onsen lieven vadere heren Janne van Ymmersele , riddere , Aerde van Hoevorst , Janne gheheten van + der Elst , heren Jans soene , ende Gerarde van Wesenbeke , alse manne ons liefs heren tshertoghen van Brabant , ons hier in ende tote desen orbare gheleent ; ende omme onsen hof te sterkenne , die~welke Jan weder in~quam beraden ende wijsde voer enen rechte , met vollen ghevolghe der voers_ manne , dat die voers_ here Philips dit vorscreven goet Ter Elst mit allen sinen toebehoerten ons dat op~draghen soude in die hande tote tsgheens behoef , die dat vercreghen hadde ; ende daer op vertyen metten halme ende hem daer in nemmermeer rechts te bekennen noch te vermeten ; den~welken poenten van + der onterffenissen , alse recht al ghesciet ende tfonnisse wijsde , soe quam voer ons een religiose in Gode vadere dabt van Tongerloe , die dit voers_ goet gheheellec ende al , met allen sijnre toebehoerten , ghelijc voerscreven es , ghecreghen hadde ende heeft ; ende van + den coep ghenoech ghedaen begherende tote desen goede te comenne ; waer op wi den voirs_ Jan van Euwen onsen manne maenden , hoe dat wi dat van + den rechte sculdech waren te doene , welks Jan , hem beraden metten voers_ ons liefs heren tshertoghen mannen , wijsde dat wi den voers_ abt hant ende mont verleenen souden ende ontfaen van + den voers_ goede in onsen erfliken man ; na welken vonnisse wi den voers_ abt ontfaen hebben ende hant ende mont verleent , als onsen erfman ende hi heeft ons weder hulde ende manscap ghedaen van + den voers_ goeden alse een man sculdech es sinen here ; in allen desen saken van voer ende van na ghesciet al dat een recht wijsde ende en~gheen poente van rechte daer in achter ghelaten ; ende omme dat wi willen dat dit vast ende ghestadech blive den voers_ abt teweliken daghen , soe hebben wi onsen seghele aen desen jeghenwordeghen brief ghehanghen , ende bidden den voers_ Janne van Euwen , onsen man , want hi die voers_ vonnissen wijsde , ghelijc ende in al + der manieren dat boven bescreven es , ende den anderen ons liefs heren tshertoghen mannen voers_ , want si daer bi ende ane waren , ende der selver vonnisse volghden dat si hare seghele metten onsen hanghen willen ane dese jeghenwordeghen letteren ; ende ic Jan van Euwen voers_ bekennende dat ic die voers_ vonnissen ghewijst hebbe , ghelijc voerscreven es , ten manissen mijns heren Godevarts voers_ ; ende wi her Jan van Ymmersele , riddere , Aert van Hoevorst , Jan gheheten van + der Elst , heren Jans soene ende Gerart van Wesenbeke , manne ons liefs heren tshertoghen voers_ . ende gheleent tote desen orbare den selven Godevarde voers_ , want wi hier bi ende ane gheweest hebben , daer die voers_ Jan dese vonnissen wijsde , ende wi hem diere volcomelijc volghden , soe hebben wi onse seghelen metten seghelen Godevarts ende Jans voers_ ane desen jeghenwordeghen brief ghehanghen , in kennissen ende eweliker ghedenkenissen der waerheit . Ghegheven in + den jare ons Heren doe + men screef dusentech drie + hondert vijftech ende zesse , des ander daechs na sente Remeys dach .