Corpus Van Reenen-Mulder (CRM14): Oorkonde K809r35801

Allen den ghenen die desen brief solen sien ende horen lesen , Art van den Broeke , Jan van Lombeke , Willem van den Bloke ende Bartholomeeus van den Spieghele , eyghenghenoete ons liefs heren ende + en wijs here Wouter Bac , bi die ghehenkenisse van Gode abdt van onser Vrouwen cloester van Tongerloe , van der ordenen van Premonstreit , des bisdoms van Camerike , in deene side , ende Godevart van Ymmerseele , sone heren Jans van Ymmerseele , riddere , in die andere side ; welke abdt voergh_ versochte Godevarde voerseit van rechte , dat hi hem tgoet van der Elst , met allen sijrre toebehoerten , gheleghen in die prochie van Duffele , dat die voersede abdt van hem toet enen erfleken leene hielt , vereyghenen wilde teeweleken daghen , hem ende sinen nacomelinghen te houdene ende te besittene als vrij eyghen goet , ghelijc hi den abdt voers_ gheloeft hadde ; dies die voergh_ abdt vore ons goede brieve toende ende oec brieve van minen here ende vrouwen van Brabant , dadt hare consent ende wille ware , dat Godevart voergh_ des machtech ware dat goet te vereyghenenne ende dabdt des oec des machtech ware dat goet als vrij eyghen goet tontfane , te houdene ende te besittene dat voergh_ goet teeweleken daghen als vrijeyghen goet , hi ende sinen nacomelinghe ; welke Godevart , hem beraden met sinen vrienden , andwerde ende seide hi woudt gherne doen , na die gheloeften die hi ghedaen hadde , ende na den orlof ende consent mijns heren ende vrouwen van Brabant voergh_ ; waer bi here Jan Brijn van Craeyenhem , riddere , mercgrave in den lande van Rijen , overmids versuec ende begherte der partijen voergh_ maende ons , eyghenghenoten voers_ woe Godevart den abdt voergh_ gnoech soude doen na sine begherte , also dat wij wijsden eendrachteleke , dat Godevart een halm soude nemen ende den abdt op~draghen tgoet van der Elst voers_ , daer dabdt vore man af was , te houdene , te hebbene ende te besittene teeweleken daghen , hi ende sine nacomelinghe , als vrij eyghen goet , Godevarde voers_ sinen erfghenamen noch sinen nacomelinghen , in den voergh_ goede nemmermeer en~gheenrehande recht meer daer in te vermetene noch manscap , dat al gesciede als recht . In kennissen der waerheit , hebben wij , eyghenghenoete voergh_ , dese letteren bezeghelt met onsen zeghelen , ende bidden eerachteghen lieden ende wijsen , Heinricke van Middelhoven , Arde van Lyra , Goeswijne ?her Meys van Malle , ende Heinricke Goes , scepenen in Herenthals , dat si hare zeghele met den onsen aen dese jeghenwordeghe letteren hanghen willen . Ende wij Heinric , Art , Goeswijn , ende Heinric , scepenen in Herenthals voergh_ , omme beden , wille ende versuec der eyghenghenote ende van beiden den partijen voergh_ , ende want wij daer bi ende over waren dat al dit ghesciede in al der vormen ende manieren ghelijc voerscreven es , so hebben wij onse zeghele met den zeghelen der eyghenghenoete voers_ , desen jeghenwordeghen letteren aen~ghehanghen in ghetughe ende in vestinghen van al den saken voerghenoemt . Ghegheven in den jare ons Heren dusentech drie + hondert vijftech ende sevene , op den seven + en + twijntechste dach van Marte .