Corpus Van Reenen-Mulder (CRM14): Oorkonde K809r36201

Cont si allen luden dat wi , Woutere van Duffle , Willem van Wilre , die men heyt her Moreel , Florens van Duffle ende Jan Briens van Craynhem , riddere , overmids discencie ende discoert dat was tusschen onsen lieven gheminden heere den heere van Duffle ende van Ghele , in deene ziede , ende religiose lude her Wouter Bac , abt , ende convent van Tongerloe , der ordinen van Premonstreyt , op dander zide , van erve , leene , beemden ende lande onder des voerghenoemden heeren van Duffle heerlecheyt gheleghen , van welken discencien ende discorden wi van beyden ziden ghebeden ende toe~ghenomen worden als eendrachteghe effeneren ende segghers , alle dinc aen~ghezien , soe maecten wi eenen vriendeleken pays ende accoert tusschen onsen lieven heere den heere van Duffle vorghenoemt ende die religiose lude , abt ende convent voerseit teeweleken daghen durende , ghelijc als die tscarteren ende brieve van beyden ziden houden ende begrepen hebben , dat es te verstane , dat hi hen alle hoere goede die se hadden ochte hebben opten daet deser letteren gheammortizeert , ghevriet , gheledecht ende van allen leecleken rechte ghedoot heeft , behoudeleec sinen erfchijnse ende sijnre hoegher heerlecheit van dien voerseiden goeden , omme dat alle dese vors_ goede voer onsen lieven heere den heere van Duffle ende voer ons ridderen voerghenoemt met namen ende met toenamen in ghescriften over~ghelevert worden van + den voerseiden religiose luden , abte ende convente , hen in toecomenden tiden yeman daer aen stoten ochte calengiren mochte , dat alle dese voerseide goede in den tschartere niet ghenoemt en sijn bi namen ende bi toenamen ghelijc als sise over~ghelevert hadden , daer wi bi ende over waren , ende in desen brief ghenoemt sijn , hier nae volghende , dat es te verstane : tgoet van Donghenen met allen sinen toebehoerten ; item alsulke goede als onder hen gheleghen zijn toebehorende den goeden van Passcherle , Uutscolen , Plassendonc ende Millinghen ; item eenen beemt gheheyten die Cuccucshoeve , gheleghen tusschen den beemt van + der slusen ende Wellens hoeve ende die groete Lake ; item eenen beemt gheheyten Doudebeemt , gheleghen tusschen der heeren bosch van Aeverbodie , ende van + der slusen beemt voerseit over dander zide ; item eenen beemt gheheiten Zammaels beemt , gheleghen ane den ouden beemt voerseit over die Lake ; item eenen beemt gheheiten van den Loekere , gheleghen op die Ziept over die Lake ; item eenen beemt gheleghen op die Slect , tusschen Jan Ghilijs kindere ende Ghisels Tsvisschers ; item een stucke beemts gheleghen ane die Hoedonc ; item een stucke beemts gheleghen op Ribbroec , daer die Lake tusschen loept ; item eenen beemt gheleghen ten Houte , tusschen die Sleehaghe ende Henrijcs eusele van + den Eckere ; item eenen beemt op + die ander zide Henrijcs eusele van + den Eckere voerseit ende henrijcs beemt van + den Houte ; item een heyde gheleghen tusschen Arnts kindere heyde van Bladerdonc ende Boekenshoeve ; item een stucke lands , heyt dat Witvenne , gheleghen metten eynde ane Korshoeve ; item eenen beemt gheleghen op die Wimpe tusschen den Beesbeemt ende Jan Meys beemt ; item die beemde ten Broecke alsoe verre als se onder hem gheleghen sijn ; item die beemde Teyndhout , alsoe verre als onder hem gheleghen sijn ; item een stucke beemts gheleghen in Swartsbeemt opten hoec ter Ronten waert , alsoe verre als hi onder hem gheleghen is ; item eenen beemt die Ghilijs van Leemputten was , daer Jans kindere van + den Eynde int chijnsboek af staen ; item dertech oude groete die den convente toe~behoeren ; item eene heyde , gheheyten Blocs~Uutfanc ; item eene heyde gheleghen neven die Tieghelrien ; ende alle andre goede , erve , chijns , pacht , hoe si ghenoemt ocht onghenomt sijn in diepen ochte in droghen , toe~behoerende dien religiosen luden abt ende convent voerseit , gheleghen onder ons liefs heeren tsheeren van Duffle heerlecheit voerseit , soe hebben ons die voerghenoemde religiose lude abt ende convent ghebeden om Gods wille , omme die meerre zekerheit ende vestinghe , onsen voerseiden heere van Duffle ende den religiosen luden abt ende convent voerghenoemt in beyden ziden te voldoene dat wi onse propere zeghele ane dese letteren willen uuthanghen . Ende wi , Woutere van Duffle , Willem van Wilre , Florens van Duffle ende Jan Briens van Craynhem , riddere , omme bede wille der voerseider religiose , omme dat ons dese voerseide zaken condech sijn ende daer mede ende over gheweest hebben , soe hebben wi dese letteren bezeghelt met onsen zeghelen uuthanghende . Int jaer ons Heeren dusentech drie + hondert sestech ende twee , op sente Peters dach ad vincula te in~gaende Oestmaende .