Corpus Van Reenen-Mulder (CRM14): Oorkonde K809r36401

Wy Peter van + der Heyden ende Jan Bastijn , scepene ons heren tsabds van Tongherlo , maken cond allen den ghenen die desen brief zelen sien ende horen lesen , dat vore ons sijn comen in properen personen Peter van + der Vlaest ende Lijsbet van + der Rijdt sijn witteghe wijf , ende hebben bekent ende verlijdt , dat si witteleke vercocht hebben ende sculdech sijn Aerde van Lijshout ende sinen erfghenamen drie viertelen rogs erfeleke ende emmermeer daegs goet ende custbeer te allen kersavonde te betaelne metter maten van Liere ende te leverne binnen Liere sonder Aerds cost voernoemt , van jare te jare volghende te eweliken daghen , op een half boender winnens lands ende vijftien roeden , gheleghen bi + den Loe tusghen der heren landt van sente Bernaerds ende der kerken landt van Broeghem , dat wilen was Janen van Eewen , ende op een vierendeel lands int Loe gheleghen , streckende neven Jans erve van den Loe ende der heren van sente Bernaerds , ende es ghenoemt de Wilde~Aert ; voert soe hebben de voernoemde Peter ende Lijsbet sijn wijf den voernoemden Aerde den voernoemden onderpant los ende vri gheloeft te waerne van allen commere , uutghesteken dertien penninghe goeds ghelds ende een quartier ghersten ende een scout vat evenen ; ware dat sake dat uut den voernoemden onderpande meer commers ghinghe oft ghemaect ware , dan hier benoemt staet , dan hebben de voernoemde Peter ende Lijsbet sijn wijf altoes den voernoemden Aerde gheloeft op te rechtene met hen zelven ende met haren goede , alse dat de voernoemde Aerdt altoes wale ghehouden si ende zeker sijns voernoemde pachts ghelijc dat voerscreven es . Ende wi Peter ende Jan , scepene voernoemt , want ons dit al condech es ende vore ons al es ghesciet met vonnesse ende met rechte ende gheen poent achter ghelaten datter toe sculdech was te ghesciene van rechte , en om bede Peters ende sijns wijfs ende Aerds voernoemt , dat wi dit bezeghelen wouden , ende want wi ghene zeghele en hebben , soe bidden wi eersamen lieden ende wisen Adamen van Berghen ende Wouteren van + den Aemere , mannen onser vrouwen van Brabant , dat si desen brief bezeghelen in kennessen der waerheit . Ende wi Adaem ende Wouter , manne voernoemt , hebben onse zeghele aen desen brief ghedaen om bede der voernoemder scepenen ende der partien . Ghegheven in kennessen der waerheit doen men screef djaer ons Heren dertien + hondert tsestich ende viere , tsaterdaegs vore sente Germaens dach .