Corpus Van Reenen-Mulder (CRM14): Oorkonde K825r38501

Cont si allen den ghenen die dese letteren sien selen ende horen lesen , dat wij , Heinrijc , de Bastaerd van Immersele , ende Isaude sijn wittich wijf kennen ende lien in desen openen brieve , dat ons wale ende witteleke gnoechghedaen is ende dat ons wale betaelt is vander abdissen ende van des ghemeins convents weghen vanden cloestre van Rosendale , vier hondert mottoene die~welke dat cloester voerseit sculdich was van Costijns weghen van Berchghem , daer af een brief sprac , heme ofte den brenghere dies briefs dat te betalene . van welken vier hondert mottoene voerseit wij der voerseder abdisse ende convente ende den ghemeinen cloestere van Rosendale , ende oec hen allen die hier af quitantie behoeven , clerleke quite scilden ende gheloven hen oec , waert dat sake dat iement den voerseden cloestre ofte iemende van haren weghen van desen selven vier + hondert mottoenen voerghenoemt hier namaels aensprake , dat wise daer + af verantwerden selen , ende oec commerloes daer af houden ende onntheffen selen . In kennissen der warijt ende om die meerder vestichheit , hebbe ic Heinrijc voerseit voer mi ende voer mijn wijf voerghenoemt desen brief beseghelt met minen propren uuthanghende seghele . dit was ghedaen int jaer ons heren doen men screef dertien + hondert ende vire ende tachentich , opten twintichsten dach van januario .