Corpus Van Reenen-Mulder (CRM14): Oorkonde L207p37005

Wij Melijs van + den broec Gherart Arnts soen / willem van Scarpenb_g Gheuart van Stribosche willem arnts sniders soen Jan die weelde en_ Mychiel eynghelen soen Scepen tot ghem_t tughen in desen openen brieue dat voer ons is comen florens van werrenb_g / doe hi sijns goeds machtich was in sinen alinghen bedde en_ heeft vercoft brod_ Robb_ van verneb_g Comend_ des huys van ghem_t tot behoef sijns oerdens en_ met rade brod_ henrics van lewenb_g des landc_ en_ sijnre broder van + der balien van + den biessen alsulken tijns eest hoenre eest ghelt of erfghelt als hi ghelden heeft iaerlecs binnen den ghericht van ghem_t . vutghenomen alsulken tijns als hi ghelden heeft vuyt tielkens huyse en_ houe dat leghet op die een side aen tusen en_ op die ander side aen didderic van ghem_t / en_ alsulken tijns als hi met sijnre gheselscap ghilt den Cloester van bind_en om vijf + hondert pont en_ vijftich pont payments als ghenghe en_ gheue is binnen ghem_t . welc ghelt florens vors_ ghiede en_ kende hem wael betaelt van + den Comend_ vors_ . Voert so heeft flor_ vors_ den Comend_ vors_ den voerghenoemenden tijns en_ ghelt en_ hoenre / gheloeft te weren op hem en_ op al sijn goet also als + men erue en_ tijns sculdich is te weren Jn orconden der waerheit so hebben wij onsen ghemeynen zeghel des Scependoemps van ghem_t aen desen brief ghehanghen in + den iare ons h_en dusent drie + hond_t en_ tseuentich op sente Elsbenen dach .