Corpus Van Reenen-Mulder (CRM14): Oorkonde L229a38801

Wy gherart van den velde en_ Eyliaes willems zoen Scepen in ghestel bi herlaer doen Cont allen luden met kennis der waerheit dat voer ons comen is gherijt herman baten zoens zoen en_ kende dat hi wittelec vercocht heeft ruelken van der stappen / een stuc lans hem toe~hoerende als hi seyde gheleghen tot ghestel ? die twe veken neven erfnis ruelkens vors_ mett_ eenre siden en_ neven erfnis Jans switten mett_ ander siden En_ gherijt vors_ heeft den vors_ ruelken dit vorscr_ stuc lans op~ghedraghen / en_ heeft + er helmelinghe op verteghen tot behoef ruelke_ vors_ dien seluen erfelec te hauden en_ ewelec te besitten / Voert heeft gheloeft gherijt vors_ op hem en_ siin goet den vors_ ruelken dit op~draghen en_ vertyen des vorscr_ stuc lans vast en_ stede te hauden tot eweliken daghen recht en_ sculdich waerscap te doen / en_ alle voerco_mer af te doen en_ te waren voer een vri erue Jn kennis der waerheit soe hebben wi desen brief open bezeghelt metten zeghel ons ghemeins scependoms van ghestel Ghegheuen in den Jaer ons h_en dusent drie + hondert acht en_ tachtentich in sente katherinen daghe