Corpus Van Reenen-Mulder (CRM14): Oorkonde L237p31102

Wy didderic van dorne didderic snoec henric der kindercnape peter rolekens sone henric van zonne een smet didderic van + der bruggen ende godeuart Jans ogen sone Scepenen van helmont grueten allen die ghene die desen brieff sullen sien of horen lesen metter kennisse der waerheit wy doen cont allen den ghenen no sijn en_ noch sijn sullen dat rouer van martsel voer ons quam en_ gaf een mudde roggen herefleke den armen ende den heylighen gheest van helmont te gelden opten yersten alre heylighen dach die na hore moder doet ghelegen is wt sinen huse ende sinen lande also alst in die haghe gheleghen is / den armen scoen mede te copen Jairghelijcs opten voer~gheseden alre heylighen dach en_ dit mudde rogghen gaf rouer herefleke in gherechten almissen ende in sinen alinghen bedde ende doe siin erue onbecom_ert was Jn orkonde welker dinc hebbe wi vore~ghesede schepene bezeghelt desen brief met onser statzeghel Dese brief is ghegheuen Jnt Jair ? ? ? ? scriuet (onleesbaar)