Corpus Van Reenen-Mulder (CRM14): Oorkonde L237p32901

Wj jan becker . peter ruelekens sone . henric van endhouen . Didderic van dier brugghen / godeuart marien man / godeuart van dien gore . en_ Arnt jans sone . Scepene in helmont . grueten alle die ghene die desen brief solen zien en_ horen lesen metter kinnissen dier waerheyt . Wi done cont allen dien ghenen die nu sijn . en_ noch sijn zolen . dat voer ons es comen . heylewich die beghine van liesoyt die woent bi spersoens in die haghe en_ heyft bekent dat si sculdech es . dien heylighen gheest van helmont xxv . pont enen conincs tornoysen voer . xvj . penninghe oft payment daer ieghen en_ heyft die ghelouet op hoer en_ op al hoer goet . Matheus van dien hoyt die mester es van dien heylighen gheest tot sinen wille te ghelden voert eyst vorwarde so wie mester es van dien heylighen gheest en_ met desen brief compt dat hi dese voer~ghenomde xxv . pont / die dese ?~ghenomde heylewich sculdech es / dat hi die mach manen en_ innen Jn orconde welker + dinc so hebbe wi voer~ghenomde scepen / om hoerre twier beden wille alst ghewonelic es bezeghelt desen brief met onser stat zeghel van helmont desen brief es ghegheuen in die jaer ons heren dat scriuet dusent jaer . drie + hondert . + neghen en_ twintech . op sente phylips en_ jacobs daghe