Corpus Van Reenen-Mulder (CRM14): Oorkonde L237p32902

Wj Jan becker . Peter ruelekens sone . Henric van endehouen . didderic van dier brugghen . godeuart marien man . godeuart van dien gore . en_ arnt jans sone . Scepene in helmont . grueten alle_ die ghene die desen brief solen sien en_ horen lesen metter kinnessen dier waerheyt . Wi done cont allen dien ghenen die nu sijn . en_ noch sijn solen . dat voer ons es comen henric van endehouen . onse mede~scepen . en_ heyft betoent metten scepen van helmont die dier tijt scepen waren doe dese vorwarde ghemaecht was . dat hi gheldende heyft een mudde rogghen . erfelec dat hi ghecreghen heyft in sinen wedewen~stole in een stuc lans dat gheleghen es bi jans van bisteruelt . en_ in enen bempt die gheleghen es in dien p_recker van helmont . die gheheten es ole~bempt . dat was metter ghenaden gods henrics corpt_ soens . en_ wi done cont dat dese voerghenomde henric dit voer~ghenomde mudde rogghen heyft v_cocht dien heyleghen gheyst van helmont totter armen behouf in allen dier vorwarde dat ment desen voer~ghenomden henric gout . op onser vrouwen daghe dat men kersen bornt en_ metter maten van helmont Jn orconde welker dinc so hebbe wi voer~ghenomde scepen om hoere twier beden wille_ alst ghewonelec es . bezeghelt desen brief met onser stat zeghel van helmont Desen brief es ghegheuen in die jaer ons heren dat men scriuet . M˚ . jaer ccc˚ . + xxi&xring; . op dien heyleghen pinxdaghe .