Corpus Van Reenen-Mulder (CRM14): Oorkonde L237p36001

Cont si allen luden . dat wael betught is metten Scepene van helmont also als recht is dat die here van helmo_t heeft doen legghen een waerheit om goet dat gestolen was te helmont / en_ heeft daer toe doen ghebieden i_ die kercke te helmont alle die van helmont / So wie daer niet toe en queem dat men hoem houden soude voer den sculdeghen / en_ doe me_ die waerheit dede / en_ elkermalke sijn conde daer af ghezeeght hadde . doe vraghede men hun voert van + der ghemeynte van helmont daer horre Seue_ man_e toe ghecore_ waren die ghemeynte te hoefslaen na hore_ besten vijf sinnen / daer co_senteerden si al / en_ een yghelike die daer waren en_ seiden So wat die seuen ma_ne den here daer af deden / en_ so wat sij met diere ghemeynte vors_ deden na hore_ besten vijf sinnen dat sij des bi him bliue_ solen ghelijc hu_ seluen . Sonder Jan huseman en_ Art van heyenbraken die seiden en_ consenteerden So wat sij deden den here daer af dat weer hun lief i_ dien dat sij die ghemeynte hoefslaen / des bleue_ sij bi hu_ ghelijc hu_ seluen so wat hu_ daer af queem / ende Peter van + der doseldonc ende Andrijs die weuer en_ lambrecht van bistervelt die en wouden bi hu_ niet bliue_ hedden + se daer af last oft co_mer hir bi waren die Scepene te helmont Reyner van + der wintmoelen Noude becker Jan orsse Godert van bistervelt Jan Neue Jan dusche en_ Symon lambrechts langsmeeds soen Jn orconde der lett_en bezeghelt metter stat zeghele van helmont als ghewoent is Ghegheuen int Jare der gheboerte_ ons h_en M . + ccc en_ Sestich in sinte steuens dach .