Corpus Van Reenen-Mulder (CRM14): Oorkonde L237p39201

Peter jan peter soens soen van helmont heeft wittelic vercocht den gasthuysmeest_en tot behoef des gasthuys van helmont een mudde rogs erfpachts der maten van helmont allen jaer te betalen op onser vrouwen dach als men kerssen bornt wt enen stuc beempts ghelege_ tot helmont tusschen erue melijs van milheze aen deen zide en_ erue hermans van eyndhouts aen dander zide / dat peter voers_ ghecregen van arnt lysen lypkens soen gelijc die scepen~brieff van helmont daer op ghemaect volcomelike haudende is / welc scepenbrief voirs_ die voers_ peter ouuerghegheue_ heeft ende opghedraghen ende heeft dair op en_ op dat mudde rogs erfpachts voirs_ verteghen tot behoef des gasthuys voirs_ ende heeft gheloeft op hem en_ op al sijn goet douu_gheue_ ende dopdraghen ende tfertien vast ende stedich te hauden tot eweliken dagen ende te weren van allen voirco_mer die daer van sinen wegen in sijn mach Ghetughen waren hier ouer scepen tot helmont dyeric snoec vander zantvort ende Jan van stipdonc Ghegheue_ Jnt jair onss heren M ccc twee ende neghentich op sente seuerijns auont