Corpus Van Reenen-Mulder (CRM14): Oorkonde L271p36602

Wj Sander vyncke Riechter / Adaem mout ende lodewiech degen scepene to venle doen Cont alle_ luden die desen brief suelen sien of hoeren lesen / Ende tugen dat onder onsen segelen die aen desen brief gehangen sijn Dat voer ons sijn comen Arnt van lomme ende Gudel van weuelkouen sijn witlic wief ende hebben bekant dat Sij hebben verkocht in oeren alingen bedde mit oeren gueden wille recht ende redeliken Dideric van lomme ende Gebelen sinen witliken wiue ende oere Eruen / drie morgen lants / eyn + ende + twintich roden lants min dat geheiten is die kersse so wie dat gelegen is opten mulenvelde tusschen adaym mouts lande van der eynre syden ende Johans lant van lomme des Jongen van der ander syden / alreneest rurende den hoenrenlande Omme eyn su_me van gelde die arnt ende Gudelen voers_ wale betaelt is / Ende Arnt ende Gudel voerg_ hebben alincliken vertiegen op dit voerg_ lant / ende sijn des vytgegangen voer Riechter ende voer scepene / ende hebben oen daer af ontErft ende hebben Dideric ende Gebelen voers_ daer ane geerft mit alle den recht dat der stat recht van venle gelegen is / also dat arnt noch Gudel voers_ daer ane voertmeir gheenre~hande recht hebben noch behalden en + suelen / voert so hebben Arnt ende Gudel voers_ geloeft Dideric ende Gebelen voers_ ende oeren Eruen dit voerg_ lant to weeren Jaer en + daech van alle den ghenen die ten rechten comen willen also alse recht ende gewonentliken is te doen van Erue bennen der stat van venle / en_ alle vurbrieue ende alle aensproke af + te + doen / Alle argelist afgedaen van allen punten voers_ Gegeuen int Jaer ons h_en Dusent Drie + hondert Sesse ende tsestich des satersdaechs na sente Remeis dach des bysscops