Corpus Van Reenen-Mulder (CRM14): Oorkonde L271p37001

Wj Arnt van heringen richter Adam mout en_ lodowigh degen achepen te venlen doen Cont allen luden die desen brief solen sien of hore_ lesen en_ tugen dat onder onse segelen die aen desen brief gehangen sijn Dat voer ons is comen gerat van lo_me die gerats zon van lo_me was En_ heeft bekant dat hij heeft verkoght recht en_ redelich martijn betken en_ stijnen sijne_ wittigen wijue en_ o_en eruen sijne vier morge_ en_ vijf ende durtich roden lands so wie die gelegen sijn myt alle o_en tho~behoren jn den velde aen ghier oien tussen dierix lande va_ lo_me was van der eenre sijden en_ tussen johans lande van lo_me des alden van der ander sijden O_me een so_me van gelde die gerat voers_ wale betaelt is En_ gerat voers_ heeft alincliken vertegen op dit voerg_ verkoght landt En_ is des vtegegaen voer richt_ en_ voer schepene En_ heeft vme daer af onterft En_ heeft martijn en_ stijnen voers_ en_ oer eruen daer aen geerft myt alle den recht dat derre stat recht van ve_len gelegen is Also dat hij daer aen voertm_e gheenre~hande recht hebben noch behalden en sal En_ van desen voerg_ lande sijn gedaen ons h_en gebot van gelren en_ ons_ stede gewoende be_nen den hospitael van venlen sesse weken Voert so hebben gerat voers_ en_ sijn oeme johan van lo_me der alde gelaeft martijn en_ stijne_ voers_ en_ o_en eruen dit voerg_ verkoght landt te weren jaer en_ dach van alle den ghenen die ten rechten come_ wille_ also als recht en_ gewoenlich is te doen va_ erue be_ne_ der stat van ve_len en_ alle vurbrieue en_ alle ansprake af te doen En_ va_ des_ gelaefnisse voers_ heeft gerat voerg_ gelaeft sijne_ oeme joha_ne va_ lo_me voers_ alinch quijt en_ schadelos te halden en_ tontheffen alle argelist af~gedaen Gegeuen jnt jaer ons heren dusent dri + hond_t ende tseuentich des saterdages na sente gertruden dach derre jonfrouwen