Corpus Van Reenen-Mulder (CRM14): Oorkonde L372p34101

Vveer Richter en_ scepenen Der stat van Eyke alle den~ghenen die desen brijf sijen en_ horen soellen grute mit konden der woerheyt Dun uch te + weten / Dat voer ons en_ in onse ihegenworde komen is . Simon de bartscerre en_ heet beka_t sculdich te + sin francke_ Roef of sinen gherven . + vj + . aude grote des Coninx monten van francrike / iaerlike en_ erflike Cens / en_ den te talen in sint lambrechts daich . te mere versekernisse heet he home tonderpande ghesat eyn huis mit der hoefstat dat ghelegen is tuschen Reyners huis des smeets en_ gobbels huis vogels ane den merct . in voghen of de voergesagde symon v_sumelike of ghebreyclike were / den voerghenoemden Cens in den voerghenoemden dage te talen so mach francke of sine gherven / no dat Onderpant stoen / mit menenisse des Richters en_ mit vunnenisse der scepenen / as der stat recht steet / voert wert sake / Dat Reyner der smeet of sine gherven treghe weren katherine_ van leechoven of horen gh_ven te talen . + viij + . aude grote van sinen huse mit der hoefstat dat bi des voerghenoemden symons huis gheleghen is dat sijt mit den recht krigen m˚ste / en_ Reyner de do voerghenoemt is of sine gherven nijt en verrichtden so mach symon de do voerghenoemt is of sine gherven ten derden ghedinghe / der voerghenoemder katherinen of horen gherven Den Cens betalen en_ haude_ dat guit mit Den sinen voer sijn prop_ guit Op den ghenoemden Cens / voert weer Dat sake dat symon de do voerghenoemt is of sine gherven nijt die vurwerden en deden / so mucht franco de do voer~ghenoemt is of sine gherven d˚n alle die vorwerden die de voerghenoemde simon of sijn gh_ven d˚n souden / voert weert sake dat symon de do voer~ghenoemt of sine gherve_ die voerghenoemde vorwerden deden en_ liten + se vervallen so soude francke de do voer~ghenoemt is of sine gh_ven alle die vorwerden hebben die Symon de do voer~ghenoemt is of sine gh_ven ane denen voerghenoemden gude hadden . Om dese voerghesagde Denc te vervollen / en_ Om ghetughenisse dir denghe en_ Om beeden wille der partien hebbe weer onsen segel heer ane ghehangen Ghegheven in den iaer ons heren . + MCCC + . + Xlj + . in sint valentijns Dache