Corpus Van Reenen-Mulder (CRM14): Oorkonde L678r39401

Jc Jan van heeswijc doe cont en_ kenliic allen den ghonen die desen brief sollen sien of horen lesen dat ic verkont heb en_ verlye hughe hannaerts zoon van wiic een bloc tiende dat gheleghen is tot veen en_ gheheiten is kyuiits~ven tusschen des persoons tiend van wiic oestwaert en_ aernts tiend van heeswiic westwaert streckende van + der veenscher steghen totter wutscher steghen toe / wt~ghenomen die tiend van viij hont lants die jans van noorden was van my te houden en_ van minen nacomelinghen hughe hannaerts van wiic vors_ en_ sinen nacomelinghen tot enen rechten erfleen En_ dese vors_ tiend sal + men verheerghewaden met ene_ gouden ghulden jn diere manieren als hughe hannaerts soon van wiic vors_ sterft dat dan dese vors_ tiend versteruen sal op sinen ousten zoon die hi heeft bi joncfrouwe liisbet coptiten dochter En_ had hi ghenen zoon so sout versteruen op siin ouste dochter die hi had bi joncfrouwe liisbet coptiten dochter vors_ En_ had hi gheen kiinder bi joncfrouwe liisbet coptiten dochter vors_ So soud dese tiend vors_ versteruen op hughe vors_ recht oor en_ n jn diere manieren dat joncfrouwe liisbet coptiten dochter vors_ siin wiif haer tocht hier aen hebben sal also langhe als si leuet En_ want ic jan van heeswiic vors_ tot deser tiit miin man van leen bi my niet en heb So bad ic willem van cronenborch castellein tot huesden dat hi my leende hier ouer te staen Man miins lieff h_en van hollant Claes spirinc jans zoon / jan spirinc siin zoon en_ jan spirinc jans zoon Jn orconden der waerheit van desen vors_ vorwaerden heb ic jan van heeswiic vors_ desen brief open bezeghelt met minen zeghel en_ heb ghebeden Claes spirinc jans zoon / jan spirinc siin zoon en_ jan spirinc jans zoon vors_ dat si dese vors_ vorwaerden op my bezeghelen open met haren zeghelen / En_ wi Claes spirinc jans zoon / jan spirinc siin zoon en_ jan spirinc jans zoon vors_ bi beuelinghe willems van cronenborch castellein tot huesden vors_ en_ om beden wil jans van heeswiic vors_ so hebben wi desen brief bezeghelt open met onsen zeghelen als Man ons lieff h_en van hollant Ghegheuen jnt jaer ons h_en dusent drie + hondert en_ vier en_ tneghentich opten viertienden dach in april