Corpus Van Reenen-Mulder (CRM14): Oorkonde L707r38301

Jch johan johans heinrichs soens soen van ghemert / doen kunt allen luden die desen brieff soelen sien oft horen lesen en_ bekenne / Dat want mijn lieue geminde here / her Rynart van huesen . . lantco_mendur der Balien van + den Byessen / mich quijt + ghescouden heeft alsulke mansschap als ich den Co_mendure en_ den huese tot ghemert gedaen hadde / van + de_ alinge_ guyde ter vondervoert met sine_ t˚behoerten / binne_ den gerichte_ en_ heerlicheide tot ghemert gelegen Ende mich daer toe / der voers_ lantco_me_dur / die genade / en_ guyde gunst gedaen heeft / dat ich die voers_ guyde verpachten mach / en_ verpacht hebbe / o_me vijfteen mudde Rogghen der maten van helmont / So bekenne ich / dat ich die voers_ vijfteen mudde Rogghen / van + de_ vurs_ lantco_mendur / ontfange_ hebbe / in leen / met allen rechte / als ich sculdich was te doen / voer leenma_nen des lantco_mendurs / en_ huys va_ ghemert voers_ / en_ hij heeft mich ontfange_ voer sinen leenman / ou_mids / en_ in tiegenwordicheit sijnre leenma_ne hier onder gheschreue_ / en_ ich hebbe hoem geloeft en_ geswoeren / met opgherecden vingheren / en_ ghestaefden Eyden / die mansschap te hauden / den Oerden en_ huese tot ghemert voers_ / gelijc / als een man van leen sinen gerechten leenhere sculdich is te hauden Ouch hebbich geloeft in + den seluen Eyde / voer mich / mijne nacoemelincghe / en_ Erffgename_ / Oft geuiel in enegen tijden nakoemende dat ich / mijne nakoemelincghe / ende Erffgename_ / ghebrecht wurden die voers_ mansschap te hauden / als voers_ is / dat dan jch voer / mijne nacoemelincghe en_ Erffgename_ daer nae / verbonden / en_ sculdich soelen sin / den vurs_ . . lantco_me_dure / sinen nacoemelincghe_ / en_ den huese tot ghemert / die voers_ vijfteen mudde Rogghe_ Erflic te betalen / en_ alle jaer op onsser vrouwen lichtmisse dach / binne_ den dorpe / en_ heerlicheide tot ghemert / Ende daer voer / verbende ich / en_ bliuen daer voer verbonden / Ou_mids desen brieff / allen die guyde / die ich in + den gherichten en_ heerlichede tot ghemert liggende / en_ geldende hebbe / Met voerwarden / Oft geuiel / dat ich / mijne nacoemelincghe / en_ Erfgename_ voers_ ghebreclic wurden / die mansscap te hauden / alst voers_ is / en_ wij / daer o_me / vielen in + der voers_ penen / dat dan / der Oerden / en_ dat huys va_ ghemert voers_ / derre voers_ / vijfteen / mudden Rogghe_ / ghebruken soelen / e en_ die / Rastelic en_ vredelic / ophauden / en_ besitten soelen tot Ewigen dagen / sunder mijn / Mijnre nacoemelincghe / en_ Erffgename_ wederspreken / en_ wij en soelen / noch en moege_ ouch nu_mermeer beschuddenisse / noch behelpenisse daer tieghen brenghen / dat den voers_ Oerden en_ huse / daer aen sal moege_ hinderen / alle argelist vitgescheiden jn orkunde der woerheit / So hebbich . johan voers_ / mijne_ p_pren sieghel / an desen oepene_ brieff gehanghe_ Ende hebbe voirt gebeeden / ende bidde / diederic van ghemert wapenthure / Ansom Maes son van + der hoefstat / en_ willem van Middelschot / leenma_nen mijns lieue_ gemynde_ heren des . . lantco_me_durs van + den biessen / dat sij / o_me te mere sekerheit / hair sieghele bij den mijne_ hier / an desen brieff willen hanghe_ Ende wij diederic va_ ghemert Ansom Maes soen van + der hoefstat / manne van leen / vnss lieuen gemynden heren des . . lantco_mendurs van + de_ Byessen / want wij daer bij / en_ ouer hebben geweist / als leenma_ne / daer dese voers_ geloefden / en_ verbonden / van beyden partien vurs_ / begrepen / en_ gheschiedt sin in des Ordins huse tot ghemert / ghelijc / en_ in allen den manijren als voers_ is / So hebben wij o_me beeden wille / en_ versueken johans voers_ / onse sieghele / an desen opene_ brieff gehangen Ende ich willem van Middelschot / man van leen mijns lieue_ gemynden h_ren des . . lantco_mendurs van + den Byessen / want ich bij desen geloefden / en_ verbonde geweist hebbe in + den vurs_ huse tot ghemert als een leenman / en_ mich / gelijc den andere_ voers_ leenma_nen kundich is / dat sij gheschiedt / en_ begrepen sin / gelijc / en_ in allen der formen / als voers_ is / en_ ich gheen Eyghen sieghel en hebbe So hebbich gebeeden / en_ bidde den Eirsame_ manne / Lucas van Eycke / knape van wapene_ / dat hij voer mich / sine_ sieghel an desen brieff hanghen wille Ende ich lucas van Eycke voers_ / vmb beeden wille / ende versueken willems voers_ / en_ want mich ouch dese voers_ geloefden / en_ verbonde / kundich / en_ te weten sin / also / dat sij gheschiedt / en_ begrepen sin Ou_mids beyden partien voers_ / in geliker formen als voers_ is / So hebbich mijne_ p_pren sieghel / an desen opene_ brieff gehange_ / in orkunde der woerheit - Gegeue_ in + den jaer onss h_ren d˚ man schreiff . M + ccc . + ende . + lxxxiij . Op + den vridach nae sent johans dach baptisten -